Jeltoqsan kóterilisine qatysyp, aqtalǵandardyń sany 516 adamǵa jetti. Bul jaiynda Májilis depýtattarynyń saýalyna QR Premer-Ministriniń orynbasary Eraly Toǵjanovtyń jaýabynda aitylǵan, dep habarlaidy QazAqparat.
«Jeltoqsan qaharmandarynyń erligin nasihattaý maqsatynda derekti film túsirilýde. Stýdent jastar arasynda Halyq qaharmany Q.Rysqulbekovtiń qurmetine bokstan, E.Sypataevtyń qurmetine qazaqsha kúresten týrnir uiymdastyrylady. Qazaqtyń batyr qyzdary L.Asanovanyń, S.Muhamedjanovanyń jáne K.Moldanazarovanyń qurmetine óńirlerde oqýshylar arasynda shyǵarmashylyq patriottyq is-shara ótkiziledi. Jalpy elimizde Jeltoqsan qaharmandaryna arnalǵan alańdar ashý, eskertkish, monýmentter ornatý boiynsha jumys biýdjettiń múmkindikterine sáikes júrgizilýde», - dep jaýap beredi Eraly Toǵjanov.
Vitse-premerdiń dereginshe, Táýelsizdik alǵan ýaqyttan beri elimizde Jeltoqsan oqiǵasy men onyń qatysýshylary esimimen 111 nysan ashyldy. Budan bólek, QR Prezidentiniń 1991 jylǵy 12 jeltoqsandaǵy № 540 Jarlyǵyna sáikes elimizde jeltoqsan oqiǵasyna qatysqan azamattar qylmystyq, ákimshilik jáne tártiptik jaýaptylyqtan bosatyldy.
«1986 jyly Jeltoqsan kóterilisine qatysyp, oqýdan, jumystan shyǵyp qalǵan azamattardyń «aqtaý týraly» anyqtamany qoldanystaǵy zańnamaǵa sáikes óziniń dáleldi qujattaryn jergilikti prokýratýra organdaryna usyný arqyly ala alady. Anyqtama alý tártibi barynsha jeńildetilgen. 2020 jyly Almaty qalasynda aqtalǵan jeltoqsandyqtardyń sany 400 adam bolsa, 2021 jyly 516 adamdy qurady», - delingen jaýapta.
