Jeltoqsan kóterilisi qaharmandarynyń azamattyq erligin nasihattaý úshin birqatar is-shara uiymdastyrylady. Bul jaiynda Májilis depýtattarynyń saýalyna QR Premer-Ministriniń orynbasary Eraly Toǵjanovtyń jaýabynda aitylǵan, dep habarlaidy QazAqparat.
«Memleket basshysynyń Jeltoqsan qaharmandarynyń azamattyq erligin josparly túrde nasihattaý týraly tapsyrmasyn oryndaý maqsatynda Úkimet bekitilgen is-shara jospary aiasynda keshendi jumystar júrgizýde. Atap aitqanda 2021 jylǵy 19 qarashada Almaty qalasynda belsendi jeltoqsanshylardyń, Parlament depýtattarynyń, tarihshylardyń, sarapshylardyń, ǵylymi jáne shyǵarmashylyq ziialy qaýym ókilderiniń qatysýymen «Jeltoqsan – Táýelsizdiktiń bastaýy» taqyrybynda dóńgelek ústel otyrysyn ótkizý josparlanýda», - delingen vitse-premerdiń jaýabynda.
Sonymen qatar onyń atap ótýinshe, jyl sońyna deiin «Qazaqstan Táýelsizdiginiń bastaýy: Jeltoqsan kóterilisiniń mańyzy» respýblikalyq ǵylymi-praktikalyq konferentsiiasy, «Jeltoqsan oqiǵasy-1986» onlain seminary, «Jeltoqsan kóterilisiniń tarihi mańyzy: Keshe. Búgin. Erteń» respýblikalyq ǵylymi-praktikalyq onlain-konferentsiiasy ótkiziledi.
«Bul is-sharalar jeltoqsan oqiǵasynyń tarihi mańyzyn aishyqtap jáne oǵan obektivti baǵa berilýin qalyptastyrý maqsatynda tarihshy-ǵalymdar men sarapshylardyń qatysýymen pikirtalas alańyn qurýdy kózdeidi.
Sondai-aq, respýblika kóleminde jeltoqsan qaharmandarynyń erligin nasihattaý boiynsha ártúrli is-sharalar ótkizilýde. Onyń ishinde menshik nysanyna qaramastan barlyq orta bilim beretin uiymdar men joǵary oqý oryndarynda táýelsizdikke jol salǵan Jeltoqsan oqiǵasy men onyń qurbandaryn máńgi este qaldyrý maqsatynda qoǵamdyq-saiasi is-sharalar uiymdastyrylýda.
Oblystar men respýblikalyq mańyzy bar qalalarda memleket jáne qoǵam qairatkerleriniń, jastar uiymdary ókilderiniń, Jeltoqsan oqiǵasyna qatysqan azamattardyń týystarynyń qatysýymen Jeltoqsan oqiǵasynda qaza tapqan bozdaqtardy eske alý is-sharalary, monýmentterge gúl shoqtaryn qoiý rásimderi qolǵa alynýda», - dedi Eraly Toǵjanov.
