Jelide qazaqstandyq Ninety One tobyn qoldaǵan petitsiia paida boldy, - dep habarlaidy Tengrinews.kz tilshisi.
"Qurmetti QR azamattary jáne Niney One jastar tobynyń taǵdyryna bei-jai emes jandar. Sizderge osy toptyń tabynýshylary bolyp keletin Qazaqstan jastary sózin arnap otyr. Birneshe ai boldy báz bireýler olarǵa qarsy nasihat jumysyn júrgizip keledi: namysqa tietin video jariialaidy jáne áleýmettik jelilerde uran tastap, olardyń ómiri men densaýlyǵyna qaýip tóndirip júr. Munyń artynda kim turǵany belgisiz. Osyndai qysym saldarynan osy jyldyń 30 qyrkúieginen 21 qarashasyna deiin Shymkent, Aqtóbe, Qaraǵandy, Jezqazǵan, Qyzylorda siiaqty qalalarda kontsertter ótpei qaldy", - dep jazǵan petitsiia avtorlary.
Olardyń sózinshe, ár qalada BAQ nazaryn aýdaryp, jastar atynan Ninety One tobynyń kontsertine qarsylyǵyn bildirip júrmiz deýshiler tabylyp jatyr. "Jelide 300 adam qol qoidy delingen hat tarap jatyr. Biz mundai qujattyń rastyǵyna kúmánimiz bar. Bilimdi jáne zańǵa baǵynatyn adamdarǵa túsiniksiz keletin, jergilikti atqarý organdarynyń áreketsizdiginen zańsyzdyq áreketter júrip jatyr. Zańsyzdyq retinde bizge Qazaqstan Respýblikasynyń Konstitýtsiiasymen (12, 14, 20, 34 baptar) kepildendirilgen quqyq pen erkindikten aiyrýdy túsinemiz. Onyń ústine josyqsyz básekelestik turǵysynan (177-bap) Kásipkerlik kodes te buzylyp otyr", - delingen qujatta.
Petitsiia avtorlary bei-jai qalmai, "eldegi distrýktivti jańa qozǵalystyń taralmaýyna" qol ushyn berýdi ótinedi.
Eske salaiyq, munyń aldynda Aqtóbe, Qaraǵandy, Jezqazǵan jáne Kókshetaý qalalarynda halyq narazylyǵyna bailanysty kóntsertter ótpei qalǵan bolatyn. Aqtóbede bir top bastamashyl jastar kontsertke qarsylyǵyn bildirý úshin jýrnalisterdi jinaǵan. Keiin uiymdastyrýshylar ótpei qalǵan kontsert úshin alty million teńge talap etken edi. Qaraǵandy men Jezqaǵanda adamdar bilikke sharany ótkizbeý týraly úndeý jazǵan.
