QR prezidenti teleradiokesheni memleket basshysy Nursultan Nazarbaevtyń qazaqstandyq boksshy Gennadii Golovkinmen kezdesýinen beineúzindi jariialady, dep habarlaidy Sputnik Qazaqstan.
"Qyrkúiekte sen úshin óte mańyzdy jekpe-jek bar. Barsha qazaqstandyqtyń atynan saǵan sáttilik tileimin. Qazaqstandyqtar seniń jekpe-jekterińdi óte muqiiat qaraidy. Biz seni maqtan tutamyz. Bul jastar úshin, tárbie úshin óte mańyzdy", — dedi elbasy bylǵary qolǵap sheberine.
Aita ketsek, WBC, WBA (Super), IBO tujyrymdary boiynsha kásipqoilar arasyndaǵy bokstan álem chempiony Gennadii Golovkin Nazarbaevpen osy jyldyń maýsym aiynda kezdesken bolatyn. Sol joly bylǵary qolǵap sheberi chempiondyq belbeýlerin prezidentke syiǵa tartqan edi.
"Meniń jumysym — jeńip alý, al qalǵany sizdiń quzyryńyzda", — dep kúldi boksshy.
Sońynda Nursultan Nazarbaev Golovkindi "Qazaqstan Respýblikasynyń Tuńǵysh prezidenti — Elbasy Nursultan Nazarbaev" ordenimen marapattady.
Eki kúnnen keiin Golovkin Las-Vegasta "Kanelomen" qolǵap túiistiredi. Qarymta jekpe-jekti qazaqstandyq jankúierler 16 qyrkúiek, Astana ýaqytymen tańǵy saǵat 08:00 men 08:30 arasynda tamashalai alady.
