Áleýmettik jelide qańtardaǵy oqiǵalar kezindegi buzaqylardyń dúkenderdi qiratyp, tonap jatqan sáti túsirilgen video paida boldy, dep habarlaidy QazAparat.
Kadrda buzaqylardyń avtomobil trosy arqyly dúkenderdiń esigi men terezesin buzyp, saýda ortalyǵyna kirip jatqany beinelengen. Sondai-aq, zergerlik jáne basqa da bólimderdi qiratyp jatqany túsip qalǵan. Aita keteiik, IIM-degi qańtardaǵy oqiǵalarǵa qatysty óndiristegi isterdiń basym bóligin urlyq pen tonaý quraidy. Osy iske qatysy barlardy videokameralarǵa taldaý jasaý arqyly anyqtap jatyr.
Eske salaiyq, 1 qańtarda Mańǵystaý oblysy Jańaózen qalasynda saǵat 17:20-da qala ákimdiginiń aldynda turǵyndar jinaldy. Olar el basshylyǵyna videoúndeý jasap, suiyltylǵan gaz baǵasyn túsirýdi surady.
Sol kúni saǵat 18:00-de adamdar tarady. Sodan keiin 2 qańtarda narazylyq bildirýshiler sany birneshe júzdegen adamǵa artty, al aktsiiaǵa qatysýshylar ishki joldy japty. Quqyq qorǵaý organdary kúsh qoldanǵan joq.
3 qańtardan bastap narazylyq bildirýshiler basqa qalalarda jáne óńirlerde shyǵa bastady. Sol kúni Mańǵystaý oblysynyń turǵyndaryn qoldaý maqsatynda basqa jeti óńirde - Atyraý, Aqtóbe oblystary, Nur-Sultan, Almaty qalalary, BQO, Almaty oblysy men ShQO-da «beibit» mitingter bastaldy.
4 qańtarda mitingiler jalǵasty, al oǵan qoldaý bildirgen óńirler sany 11-ge jetti. Qatysýshylar sany 37 myń adamǵa deiin ósti. Almaty men Shymkentte qarýly shabýyldar jasaldy.
