KAZ.NUR.KZ
Shyǵys Qazaqstanda taý bókterindegi aýyl turǵyndary aiýlardan úrkip otyr. Ridderde jyrtqyshtar eldimeken ishine kirip, aýlada turǵan buzaýdy súirep ketken degen aqparat taraýda. Odan bólek, jergilikti turǵyndardyń chattarynda aiýdyń iri qaraǵa shabýyldap, saý-tamtyǵyn qaldyrmaǵan video tarap, halyqty odan saiyn dúrliktirip otyr. Quzyrly organ atalǵan videoǵa qatysty pikir bildirdi, dep habarlady KAZ.NUR.KZ.
Áleýmettik jelide qara aiýdyń buzaýdy súirep, qoidyń qarnyn aqtaryp tastaǵan videosy tarady. Jurt muny Ridderde bolǵan oqiǵa ekenin aitýda. Áitse de, mamandar bul aqparatty joqqa shyǵaryp otyr.
"Áleýmettik jelide júrgen qos videonyń ShQO oblysyna eshqandai qatysy joq. Bul jalǵan aqparat. Oǵan senbeýge shaqyramyn. Birinshiden, bul oqiǵa Kavkazda bolǵan. Ekinshiden, bizdiń óńirde qara aiý joq. Tek, qońyr aiý ǵana mekendeidi", - delingen aqparatta.
Qazir óńirde jyrtqyshtyń sany artqan. Mamandardyń esebi boiynsha, oblysta úsh myńnan astam aiý bar. Endi olar azyq azaiǵandyqtan eldi-mekenderdi torýyldaityn bolǵan. Al ony ekiniń birine atýǵa ruqsat joq. Sondyqtan qyp-qyzyl shyǵynǵa battyq degen baqtashylar men omartashylar aiýlardyń sanyn dereý arada azaitýdy talap etýde.
"Maýsym aiynan beri aiýlar maza bermei jatyr. 26 ara uiasyn joidy. Al bul shamamen bir jarym million teńge shyǵyn. Shamamyz kelgenshe jyrtqyshtan qorǵanyp, álekke túsip jatyrmyz. Bireý "Elektr peshterin" qoiady, endi biri tútin perdelerin jasaidy. Biraq, ashyqqandary sonshalyqty, oǵan da qaramai shabýyl jasap ketedi", - deidi omartashy Aleksei Pogodin.
Búginde jyrtqyshtardyń oiranynan Zyrian, Ulan aýdandary men Óskemen qalasynyń mańyndaǵy halyq kóp zardap shegip otyr.
Nazar aýdaryńyz: Videony júikesi juqa, júregi álisiz jandarǵa, júkti áielderge qaraý usynylmaidy!
