Almaty halyqaralyq áýejaiy shekarashynyń aitqan málimdemesin joqqa shyǵardy, dep habarlaidy QazAqparat tilshisi.
2010 áskeri bóliminiń qyzmetshisi «Vremia» basylymyna qyrkúiektiń 14-i kúni «Eir-Astana» Almaty-Gonkong reisinde bolǵan oqiǵaǵa qatysty óz pikirin bildirgen.
Ol VIP-agent biletsiz er adamnyń otbasyn shyǵaryp salýyna ruqsat berý týraly ótinish aitqanyn málimdegen edi.
«Bul aqparat shyndyqqa janaspaidy. Ishki tekserý nátijesinde áýe qaýipsizdigi qyzmetiniń, qaraý bóliminiń qyzmetkerleri, VIP qyzmet agentteri er adamdy biletsiz ótkizý týraly ótinish aitpaǵan. Buǵan VIP-terminal dálizindegi kameralar dálel bola alady. Beinematerialdar qyzmettik tekserý kezinde tolyq zertteldi», - dedi baspasóz qyzmetinen.
Áýejai ókilderi jaýapkershilikten qashpaityndaryn aitty.
«Qaraý bóliminiń qyzmetkerleri ózderiniń baqylaý pýnktinde otyrý talonyn kórsetýin talap etpei, ótkizip jibergen. Bul úshin qaraý bóliminiń inspektorlary Raqymgereev Rinat pen Qyrǵyzbaev Abylai, Zakirova Sholpan árqaisysy 20 AEK kóleminde aiyppul tóleitin boldy», - dedi áýejaidan.
Áýejai taratqan aqparatqa sáikes, jolaýshylardy tirkeý men bagaj tekserý, boarding-kontrol, bortqa otyrǵyzý - áýe kompaniialarynyń qyzmetkerleriniń mindeti.
Al ushaqqa otyrǵyzý aldyndaǵy pasport tekserý, ushaqqa otyrǵyzý aldyndaǵy tekserýdi QR UQK shekara qyzmeti oryndaidy.
Jolaýshylardy jeke tekserý, qol júgi men júkti tekserý Almaty áýejaiy qyzmetkerleriniń mindeti bolyp tabylady eken.
