Úkimet otyrysynda QR Qarjy ministri Erulan Jamaýbaev jekeshelendirýdiń barysy jaiynda baiandady, dep habarlaidy QazAqparat.
«Jekeshelendirýdiń 2021-2025 jyldarǵa arnalǵan keshendi josparynda memlekettik menshik pen kvazimemlekettik sektordyń 674 obektisin ótkizý kózdelgen. Onyń ishinde respýblikalyq menshiktiń 8 obektisi, kommýnaldyq menshiktiń - 448, ulttyq holdingter men ulttyq kompaniialardyń – 65 jáne Áleýmettik kásipkerlik korporatsiiasyna tiesili 153 obekti bar. Eger bas kompaniialardyń quramynda enshiles uiymdar da iske asyrylatynyn eskere otyryp, obektilerdiń jalpy sany 736-ny qurady», - dedi ministr.
1 aqpandaǵy jaǵdai boiynsha 384 obekt boiynsha ótkizýdiń Jol kartalary ázirlendi jáne bekitildi. Respýblikalyq menshiktiń 8 obektisin ótkizý boiynsha daiyndyq is-sharalary belsendi júrgizilip jatyr. Onyń ishinde 7 obekt 2021 jyly, 1 nysan 2022 jyly satylymǵa shyǵarylady.
«Búgingi kúni 290 obekt boiynsha jol kartalary áli bekitilmegen. Olardyń kommýnaldyq menshiktegisi – 183, ulttyq holdingter men kompaniialardiki – 39 jáne Áleýmettik kásipkerler korporatsiialaryna tiesili 68 nysan bar. Memleket basshysynyń bergen tapsyrmalaryna bailanysty Keshendi jospardyń iske asyrylýyn jedeldetý qajet. Ol úshin jergilikti atqarýshy organdarǵa, Áleýmettik kásipkerlik korporatsiialarǵa, Ulttyq basqarýshy holdingterge jáne ulttyq kompaniialarǵa obektilerdi ótkizýdiń jol kartalaryn shuǵyl túrde ázirleýdi jáne bekitýdi tapsyrýdy suraimyn. Bul rette obektilerdiń basym bóligin ótkizý merzimderi 2021 jylǵa josparlanýy tiis», - dedi E. Jamaýbaev.
