Jekeshelendirýdiń 2021-2025 jyldarǵa arnalǵan keshendi jospary boiynsha jyl basynan beri 36 mlrd teńgege 106 obekt satylǵan, dep habarlaidy QazAqparat.
Bul týraly Úkimet otyrysynda memlekettik biýdjetiń atqarylý barysyn baiandaǵan QR Qarjy ministri Erulan Jamaýbaev málim etti.
«Jekeshelendirýdiń 2021-2025 jyldarǵa arnalǵan keshendi josparynda 733 obektini satý kózdelgen. Esepti kezeńde somasy 36 mlrd teńgege 106 obekt satyldy jáne keiinnen satyp alý quqyǵymen senimgerlik basqarýǵa berildi», - dedi ministr.
Onyń aitýyna qaraǵanda, taǵy 110 obekt satylymǵa qoiylyp, 6 obekt taratýǵa jiberilgen.
«Aldaǵy ýaqytta 451 obektini jeke menshikke ótkizý kerek», - dedi Erulan Jamaýbaev.
Sondai-aq, ol biýdjettiń igerilýine júrgizilgen aýdit pen kameraldyq tekserýdiń alǵashqy qorytyndysyn málimdedi.
«8 aidyń ishinde 5,3 trln teńgeniń 634 myńnan astam memlekettik satyp alý rásimi kameraldyq baqylaýmen qamtyldy. Tekserý qorytyndysy 30 myń rásim boiynsha buzýshylyqtardy anyqtady. Memlekettik aýdit obektileri olardy joiý boiynsha 29 myńǵa jýyq habarlamany oryndady. Jyl basynan beri 2198 aýditorlyq is-shara ótkizilip, 1 trln 429 mlrd teńge biýdjet qarajaty qamtyldy. 146 mlrd teńge somasyna qarjylyq buzýshylyqtar anyqtaldy. Onyń ishinde 94 mlrd teńgeniń zańsyzdyǵy taýarlardy jetkizý, qyzmet kórsetý jáne jumystardy oryndaý arqyly qalpyna keltirildi. Aýdit obektileri qyzmetin jetildirý jáne tiimdiligin arttyrý úshin shamamen 2 myń usynym berildi», - dedi vedomstvo basshysy.
