Memlekettik kirister komiteti «Atameken» ulttyq kásipkerler palatasynyń ókili Iýrii Tileýmuratovtyń jeke tabys salyǵyn esepteý tártibine ózgerister engizý kezinde salyq qyzmetkerleriniń jibergen qateleri týraly sóilegen sózine qatysty túsindirme jasady, dep habarlaidy "Ult aqparat" vedomstvonyń baspasóz qyzmetine silteme jasap.
Baspasóz qyzmetiniń málimetinshe, azamattyq-quqyqtyq sipattaǵy sharttar jasasqan jeke tulǵalar jáne jumyskerler úshin mindetti zeinetaqy jarnasy jáne Mindetti áleýmettik meditsinalyq saqtandyrý jarnalary boiynsha shegerimderdi qoldaný jónindegi kúshine engen normalar qate bolyp tabylmaidy. Atalǵan normalar 2018 jyldan (MZJ boiynsha) jáne 2020 jyldan (MÁMS jarnalary boiynsha) retrospektivti túrde qoldanysqa enedi.
«Bul norma qazirgi ýaqytta elimizdegi qandai da bir qoǵamdyq birlestikter, qaýymdastyqtar múddelerin bildirmeitin jeke tulǵalardyń quqyqtaryn qorǵaý maqsatynda engizilgen. Budan basqa, kompaniialardyń edáýir bóligi óz qyzmetkerlerin azamattyq-quqyqtyq sipattaǵy sharttarǵa aýystyrdy. Bul áreketteri azamattardyń áleýmettik qorǵalmaýy men erteńgi kúnine senimsizdigin týdyrady. Odan basqa, jumys berýshiler tarapynan osyndai qyzmetkerler boiynsha eńbekaqy tóleý qorynan áleýmettik salyqty (9,5%) tólemeý úshin, salyq mindettemelerin ońtailandyrǵanyn atap aitqan jón», delingen habarlamada.
Komitettiń málimdeýinshe, jeke tabys salyǵy salynatyn tabystan MZJ jáne MÁMS jarnalary alynyp tastalmaǵan.
«Osyǵan bailanysty jeke tulǵalar tabystarynyń shamamen 11% - yna (MZJ-nyń 10% - yna jáne MÁMS-tiń 1% - yna) jeke tabys salyǵy salyndy. Iaǵni, mysaly, tabysy 100,0 myń teńge bolǵan jaǵdaida JTS 8,9 myń teńgeniń ornyna 10,0 myń teńgeni qurady ((100,0 – 10,0 – 1,0)*10%). Osy sebepti Salyq kodeksine ózgerister engizildi. Salyq tóleýshi (salyq agenti) qosymsha salyq eseptiligin toltyra otyryp, talap qoiý merzimi ishinde salyq eseptiligine óz erkimen ózgerister men tolyqtyrýlar engizýge quqyly. Bul rette salyq tóleýshiniń ótinishi boiynsha jeke tabys salyǵynan qalyptasqan artyq tólengen salyq biýdjetten qaitarylady», delingen habarlamada.
