Qyrǵyzstan prezidenti Sooronbai Jeenbekov qazaqstandyqtardy Astananyń mereitoiymen quttyqtady. Qyrǵyzstan basshysynyń videoquttyqtaýyn Qazaqstan Prezidentiniń Teleradiokesheni jariialady, dep habarlaidy Ult.kz tilshisi QazAqparat agenttigine silteme jasap.
«Sizderdi baýyrlas Qazaqstannyń dańqty elordasy - Astananyń mereitoiymen shyn júrekten quttyqtaimyn. Astana - bizge týysqan memlekettiń saiasi jáne ekonomikalyq jetistikteriniń qalasy. Ol eldiń artyp kele jatqan qýaty men bolashaqtaǵy órkendeý áleýetin kórsetedi», - dedi Sooronbai Jeenbekov.
Qyrǵyz Respýblikasynyń basshysy Astananyń damýy táýelsiz Qazaqstannyń qalyptasý tarihynyń quramdas bóligi ekenin atap kórsetti.
«Astana aldaǵy ýaqytta da táýelsiz Qazaqstannyń, onyń kópultty halqynyń birliginiń, jasampazdyq kúsh-qýatynyń simvoly retinde dami bersin, gúldene tússin. Týysqan Qazaqstan halqyna amandyq, beibitshilik jáne gúldený tileimin», - dedi ol.
