Qyrǵyzstan prezidenti Sooronbai Jeenbekovtiń tóraǵalyǵymen Qaýipsizdik keńesiniń otyrysy ótti. Bul týraly Sputnik agenttigi habarlaidy.
"Memleket basshysy Almazbek Atambaev zań aiasynda tergeý sharalaryn júrgizýge qarýly qarsylyq kórsetip, Qyrǵyzstannyń Konstitýtsiiasy men zańdaryn óreskel buzǵanyn atap ótti", - dep jazylǵan Qyrǵyzstan prezidentiniń baspasóz qyzmeti taratqan habarlamada.
Jeenbekov Qyrǵyzstan quqyqtyq memleket ekenin eske saldy. Memlekettiń mindeti – barlyq azamattyń zań talaptaryn qatań saqtaýyn qamtamasyz etý.
"Memleket basshysy Qaýipsizdik keńesiniń múshelerine úndeý tastai otyryp, zańdy, eldegi beibitshilik pen qaýipsizdikti saqtaý boiynsha barlyq sharany oryndaý qajettigin málimdedi, osyǵan bailanysty shuǵyl sharalar qabyldaý qajet", - dep atap ótti baspasóz qyzmeti.
UQMK tóraǵasy Orazbek Opýmbaev, Ishki ister ministri Qashqar Júnisáliev, Bas prokýror Ótkirbek Jámshitov qalyptasqan jaǵdaiǵa qatysty aqparat berdi. Otyrystyń qorytyndysy boiynsha tiisti sheshim qabyldandy.
Qyrǵyzstanda ne bolyp jatyr?
Almazbek Atambaevtyń Bishkekten 20 kilometr jerde ornalasqan Qoi-Tas aýylyndaǵy úiine shabýyl jasalǵany týraly keshe keshke belgili boldy. Kúsh qurylymdary Atambaevtyń úiiniń aýlasyna basa-kóktep kirip, ulttyq qaýipsizdik memlekettik komiteti málimdegendei, rezeńke oqpen ata bastaǵan.
Atambaevtyń jaqtastary kúsh qurylymdarynyń áreketine jaýap retinde úige kirdi. Keiinirek belgili bolǵandai, olar arnaiy jasaq sarbazdaryn kepilge aldy.
Qyrǵyzstannyń burynǵy basshysyn ustaý operatsiiasy sátsiz aiaqtaldy.
Respýblikanyń densaýlyq saqtaý ministrliginiń sońǵy málimetine sáikes, 48 adam zardap shekken. Bir arnaiy jasaq sarbazy operatsiia kezinde keýde tusyna tigen oqtan qaza boldy.
Sooronbai Jeenbekov demalystan Bishkekke oralyp, Qaýipsizdik keńesiniń otyrysyn ótkizip jatyr.
Atambaevtyń málimdemesi
Atambaevtyń aitýynsha, arnaiy jasaq áskeri qarý da qoldanǵan. Degenmen Qyrǵyzstannyń ulttyq qaýipsizdik memlekettik komiteti kúsh qurylymdary rezeńke oq qoldandy dep málimdedi.
"Kúsh qurylymdaryna úndeý jasaimyn: óz halqyńa oq atpa, munyń bári senderge jaqsylyq ákelmeidi", - dedi Qyrǵyzstannyń eks-basshysy.
Atambaev óz úndeýinde kóptegen jazyqsyz adamnyń zardap shekkenine ókinish bildirdi.
