Densaýlyq saqtaý ministri Eljan Birtanov alǵashqy meditsinalyq kómek kórsetetin uiymdardy qarjylandyrý tártibin ózgertý usynysyna qatysty depýtattyq saýalǵa jaýap berdi, dep habarlaidy "Ult aqparat".
Aita ketsek, buǵan deiin Parlament Májilisiniń depýtattary alǵashqy meditsinalyq-sanitarlyq kómek kórsetetin uiymdardy qarjylandyrý tártibin ózgertýdi usynyp, kórsetilgen kómek faktilerin tirkep, sol arqyly arnaiy tarif boiynsha qarjylandyrýdy usynǵan edi.
Bul suraqqa jaýap bergen Eljan Birtanov qazirgi júie alǵashqy meditsinalyq kómek kórsetý kezinde aldyn alý jumysyn, qyzmet sapasyn arttyrýdy qosymsha yntalandyratynyn aitady.
Sonymen qatar, ministrdiń sózinshe qazir meditsinalyq kómekpen azamattardyń bári de qamtylady. Jedel habarlamalarǵa birden shyǵý, sozylmaly aýrýlary bar azamattarǵa qyzmet kórsetý qaýipterin azaityp, menedjmentti jaqsartyp, basqarý isin jetildiredi.
«Biýdjet qarajatyn paidalaný tiimdiligi artyp, meditsinalyq qyzmet sapasyn baqylaý jumysy kúsheitilip otyr. Sonymen birge eger árbir shaqyrýǵa aqsha tólener bolsa – ol shaqyrýlardyń sanyn arttyrýǵa qatysty ekonomikalyq múdde paida bolýy múmkin. Iaǵni belgili bir patologiia boiynsha birneshe ret barý jaǵdaiy týyndaýy yqtimal. Bul jaqsy nátijege aparmaidy. Al shaqyrý azaiǵan jaǵdaida jedel meditsinalyq qyzmettiń tabysy azaiyp, bul sondaǵy qyzmetkerlerdiń ailyǵyna, janar-jaǵarmaidyń azaiyp, jóndeýge nemese avtokóliktiń qosymsha saimandarynyń qajettigine áser etýi yqtimal. Osyǵan bailanysty jedel járdem qyzmetin oryndaityn mekemelerdi qarjylandyrý tártibin ózgertý, sol arqyly arnaiy tarif engizý («aqsha patsienttiń sońyna erip barady» qaǵidatymen) – respýblikalyq biýdjettiń shyǵysynyń artýyna alyp keledi, ótkir aýrýlar men patsienttiń ómirine qaýip tóndiretin jaǵdaida jedel járdem kórsetý qyzmetine keri áser etedi. Aldaǵy ýaqytta jedel meditsinalyq qyzmetti qarjylandyrý men onyń jumysyn uiymdastyrý isi ary qarai jetildirile bermek», - dep jaýap berdi Eljan Birtanov.
