Almatyda «Uly dalanyń jeti qyry jáne qazaq ádebieti» atty Qazaqstan Jazýshylar odaǵynyń I Plenýmy ótti. Jiynda qabyldanǵan úndeýdiń tolyq mátinin oqyrman nazaryna usynamyz.
«ULY DALANYŃ JETI QYRY JÁNE QAZAQ ÁDEBIETI» ATTY
QAZAQSTAN JAZÝShYLAR ODAǴYNYŃ I PLENÝMY
QABYLDAǴAN ÚNDEÝI
Qazaqstan Jazýshylar Odaǵynyń «Uly dalanyń jeti qyry jáne Qazaq ádebieti» atty I Plenýmyna qatysýshy qalamgerler QR Prezidenti - Elbasy Nursultan Ábishuly Nazarbaevtyń «Uly dalanyń jeti qyry» tarihi baǵdarlamalyq maqalasynda aitqan barlyq keleli oilary men usynystaryn qoldaitynyn jetkizedi.
«Uly dalanyń jeti qyry» maqalasy «Bolashaqqa baǵdar: rýhani jańǵyrý» baǵdarlamasynyń zańdy jalǵasy dep bilemiz. Álemdik keńistikke ulttyq kodymyz arqyly shyǵyp, barsha álem halyqtaryna qazaqtyń janyn, Táýelsizdigimizdiń myzǵymas rýhyn, qazynaly qundylyqtarymyzdy dáripteýdi murat etedi.
Qazaq qalamgerleri óz shyǵarmalarynda qashanda tamyry myńjyldyqtarǵa ketetin tól tarihymyzdy zerttep-zerdeleýge, ulttyq qundylyqtarymyzdyń nasihattalýynda osyǵan deiin de ólsheýsiz eńbek sińirgeni aqiqat. Al, myna maqalada aitylǵan arnaly jobalar qazaq ádebietindegi jańa tarihi shyǵarmalardyń jazylýyna úlken óris ashpaq.
Demek «Uly dalanyń jeti qyry» maqalasynda aitylǵan biik maqsattardy iske asyrýda aqyn-jazýshylardyń róli orasan bolmaq.
Osy oraida, Prezident Ákimshiligine, QR Mádeniet jáne sport ministrligine, sondai-aq, oblys ákimderine «Uly dalanyń jeti qyry» baǵdarlamasy aiasynda baitaq Qazaqstannyń barlyq aimaqtaryn qamtityn «Tarihi-ádebi ólketaný» jobasyn usynamyz. Atalǵan joba shejireli tarihymyzdy qaita saraptap, keler urpaqqa mura bolar tarihi taqyryptarǵa arnalǵan jańa shyǵarmalardyń jazylýyna muryndyq bolady.
Elbasy Nursultan Ábishuly Nazarbaevtyń «Uly dalanyń jeti qyry» baǵdarlamasyn Qazaqstan Jazýshylar odaǵynyń barlyq músheleri jáne barsha qalamgerler qaýymy qoldaidy ári mádeni ómirimizdegi úlken serpilis bolatynyna senim bildiredi.
