Foto: Kitaphananyń baspasóz qyzmeti
Almaty oblystyq ortalyq ámbebap kitaphanasynyń Almatydaǵy ǵimaratynda jazýshy Yrysbek Dábeidiń «Tumandy qarasha. Ai sonatasy» atty jańa kitabynyń tusaýkeser rásimi ótti. Atalǵan jiynǵa belgili qalamgerler men jas ádebietshiler, BAQ jáne basqa da mádeniet salasynyń ókilderi, jalpy ádebietsúier oqyrman qaýym qatysty, dep habarlaidy Ult.kz.
Kitaptyń tusaýkeser rásimin jazýshylar odaǵynyń múshesi, elimizge belgili aqyndar Esei Jeńisuly, Aqberen Elgezek, Erlan Júnis jáne Almaty oblystyq ortalyq ámbebap kitaphanasynyń direktory Ǵaliia Slambaiqyzy men kitap redaktory Sanjar Bekjan jasady.
Foto: Kitaphananyń baspasóz qyzmeti
Jańa kitapqa avtordyń keiingi jyldary jazǵan áńgimeleri men «Tumandy qarasha. Ai sonatasy» atty hikaiaty engen. Bulardyń túgeldei derligi – ádebietshilerdiń oń baǵasyn alyp, respýblikalyq, halyqaralyq báigelerde júldeli bolyp, keń taraǵan týyndylar.
«Prozada álemde 36 siýjet bar deidi. Sol 36 siýjetti ártúrli nusqamen, ártúrli kombinatsiialarmen shyǵaratyn jazýshylar bar. Ol jazýshynyń sheberligi dep esepteimin. Mysaly, «Tumandy qarasha» deitin bir hikaiattyń ózi bylai qarasań mahabbat týraly aityp turǵan siiaqty, biraq ishinde zamandardyń paralleldigi bar, adamnyń ishki tereń psihologiialyq iirimderin alyp shyǵady. Qazir bizdiń zamandaǵy adamnyń jalǵyzdyǵy, onyń oilary, onyń depressiiasy, bári qamtylyp tur. Biraq arǵy jaǵynda jazýshy óte keremet astarlyq qylyp, adam qai jaǵynan qarasyn, adamdy bir aiýandyqtan, jaýyzdyqtan, azǵyndap ketýden qutqaratyn bir ǵana sezim mahabbat ekenin kórsetedi. «Tumandy qarasha» hikaiatynda adamnyń ishki psihologiialyq iirimderi keremet sýrettelgen. Týyndy adamdy azǵyndap ketýden qutqaratyn – mahabbat ekenin qaiyra eske salady. «Steppe & World publishing» baspasy kitapty sapaly etip shyǵarǵanyn da aita ketkim keledi. Qaǵazy, bezendirilýi kóńilge qonymdy. QR-da berilipti. Jańa standarttarǵa tolyq sai kitapty tasqa basqan baspa ujymyna, basshysy Raisa Kaderge alǵys aitamyn. Qazaq oqyrmanynyń osyndai tamasha, sapaly kitap oqýǵa qaqysy bar», – deidi Aqberen Elgezek.
Al Almaty oblystyq ortalyq ámbebap kitaphanasynyń direktory Ǵaliia Slambaiqyzy qalamger Yrysbek Dábeidi oqyrman «Qońyz» kitaby arqyly jaqsy tanitynyn, osy basqosýǵa bir top jastar arnaiy qatysyp otyrǵanyn atap ótti. Sonymen qatar, SDU oqytýshysy Aqbota Ábiir Yrysbek Dábei shyǵarmalarynyń álem ádebieti avtorlary týyndylarymen uqsastyǵy men aiyrmashylyǵyna toqtaldy:
«Táni, jany jaraly keiipkerler qazaq ádebietinde de, álem ádebietinde de kóptep kezdesedi. Yrysbek Dábeidiń shyǵarmalaryn oqi otyryp, birneshe shetel jazýshylarynyń aitqany men shyǵarmalary oiǵa oralady. Olardyń barlyǵynan úzindi keltirmei-aq qoiaiyn. Máselen, Ernest Hemingýei. Ol «Bárimiz joǵalǵan urpaqtyń ókilderimiz» deidi ǵoi. Sodan beri álem ádebietinde «joǵalǵan urpaq» degen baǵyt qalyptasty. Yrysbek Dábei shyǵarmalarynan da sol «joǵalǵan urpaqty» keziktiresiz. Biraq Yrysbektiń keiipkerleri de, olardyń tabiǵaty da ózgesheleý. Ol keiipkerlerdi jikteý úshin jańa termin kerek bolar», – dedi Aqbota Ábiir.
Osy oraida kitapta birneshe ádebietshiler óz pikirlerin jazyp qaldyrǵan eken. Sol oilardy oqyrmanǵa da usynsaq:
Foto: nege.kz
Júsipbek Qorǵasbek, jazýshy:
Shyǵarma sońynda keiipker qyzmet ornyndaǵy egosy ólgen ortany tárk etý protsesin bastan ótkeredi Al aily túnde ónerli qyzdyń taqiiasyn shimen shegelep beretin sát, jas kúnindegi sol oqiǵa «Shileme shegeleme» degen kúi bolyp kezdeisoq aldynan shyǵatyn kez óziniń egosyn qaita oiatqan aiaýly shaq retinde sýretteledi. Bul sana túkpirindegi psihalogiialyq iirimdi taza saqtaǵan tini tiri týyndy.
Foto: Toqtaráli Tańjaryqtyń facebook paraqshasynan
Toqtaráli Tańjaryq, aqyn:
Bul bulyńǵyr túndi, bozań shaqty, bozǵylt dúnieni áserli kúimen órnektegen, onda da mahabbat pen adamnyń ishki ǵadaýatyn astastyrǵan, ýaqyt pen keiipkerdiń arasyndaǵy ýilge uqsas jatsyný men shýaqqa toly baýyr basýdy sheber órnektegen týyndy. Óń men tústiń arasyndaǵy oqiǵalar aýrasyn jandy sýretteidi. «Osyndai bir mahabbat hikaiasy bolǵan» dep keletin shyǵystyq baiandaýdy shyǵarma sońynda ishtei kúbirlegendei bolasyń.
Foto: Erlan Júnistiń facebook paraqshasynan
Erlan Júnis, aqyn:
Umsynýmen umytylýlardyń arasyndaǵy ómirdiń uzyn-yrǵasynda jady men júrekte qalǵan jalt pen jyltty sheber bailanystyrǵan shyǵarma. Demnen demge deiin úzil- dirip, úziktirip otyrady. Nárkes úmitke, nábi sezinge bailanǵan náziktik novellasy, ińkárlik sonatasy. Erkińnen tys ómir aǵynyndaǵy estandy hál. Órtjúrektiń óz kúii. Osy kúi mahabbat muǵjizasyndai sát pen máńgiliktiń arasynda qalǵan mut ormanyna sapar shektiredi, sarsań keshtiredi. Biz qarasha tumanyna malynǵan mut ormanyna nege tap boldyq, ne alyp kirdik, neni joǵalttyq? Kim bolyp kirdik, kim bolyp shyqtyq? Eger mut ormanynda mahabbatty joǵalqan bolsaq, endi odan shyǵýdyń máni bar ma?
Foto: qulady.ru
Faizýlla Tóltai, aqyn, ádebiettanýshy:
Adam jadynyń tek qana qazirgi shaqtan ótkenge qarai keri qozǵalmaitynyn, kerisinshe ótkennen qazirgi shaqqa qarai da úzdiksiz ilgerileitinin jáne osy ilgerileý kezinde esepsiz sátterdiń geterogendi ýaqyttar qaqtyǵysyndaǵy bulyńǵyrlyǵy men turaqsyzdyǵyn mátin ishindegi mátinder arqyly kórsetýge tyrysqan «Tumandy qarasha» shyǵarmasy, belgili bir deńgeide adam balasynyń ózine eń alys jáne eń jaqyn turǵan sátterdiń arasynda tanymsyz qalyp qoiý jaǵdaiyn sýretteidi. Bul beine bir máńgi qaitalanatyn, qaitalanǵan, qaitalanyp jatqan sheksiz tsikldik jaǵdai.
Aqbota Musabekqyzy
