Qazaqstandyq aýyr atlet, Rio Olimpiadasynyń kúmis júldegeri Jazira Japparqul "Jas qazaq" basylymyna bergen suhbatynda oǵan altyn buiyrmaǵandyqtan turmysqa shyqpaitynyn aitty.
– Jazira, eń áýeli jeńisińmen quttyqtaimyz. Mundai ataqqa qol jetkizgenińe búkil qazaq eli qýanyshty. Jalpy, kóńil kúiiń qalai?
– Kóńil kúiim óte jaqsy, bári oidaǵydai. Ózimniń dittegen maqsatyma jettim. Endi armanym, aldaǵy ýaqytta Tokio Olimpiadasynda jeńiske jetý. Bul Olimpiada men úshin erekshe ótti. Qoldaý kórsetken barsha otandastaryma alǵysym sheksiz. Erekshe sezimge bólendim. Jeńister eshqashan úzilmese eken deimin. Áleýmettik jelidegi jeke paraqshama ashqanda, meni quttyqtaǵan otandastarymdyń jazbalaryn kórip qýanyp qaldym.
– Básekege keleiik. Osy Olimpiadaǵy alǵashqy kezeń sen úshin qanshalyqty qiyn boldy?
– Daiyndyq, ziltemirdi kóterýdegi áreketim oidaǵydai boldy deýge bolady.
– Salmaqqa tapsyrys berý barysynda 111 kelige ózgerttińizder, muny bapkerińiz sheshti me?
– Bapkerim Aleksei Ni, ekeýmiz ózara kelisip sheshtik. Menen «qai salmaqqa daiynsyń», – dep surady. Al men tańdaýdy sol kisiniń enshisine berdim. Jalpy, 111 keli salmaqty kúndelikti jattyǵýda kóterip júrmin. Men eshqashan usynylǵan salmaqtan bas tartqan emespin. Eń bastysy, ózime sendim. Ekinshi múmkindikte 115 kelige berdik. Azdap qimyl-qozǵalysta aýytqyǵanym bolmasa, bári oidaǵydai. Odan keiin 117 keli salmaqty eńserdim.
– Biz seni 120 kelini tańdaidy ma dep kútken edik? Ziltemir baǵynbaǵan boldy ǵoi?
– Menen «qansha salmaqqa deiin kótere alasyń?» dep suraǵanda 118 dep aittym. Sál jyldamdyq jetpei qaldy. Bir jerde qatelik ketken bolatyn. Endi sol qateliktiń qaitalanbaýyn qadaǵalaimyz.
– Odan keiin ziltemirdi kóterip turyp, jerge túsirip aldyń?
– Sál jyldamdyǵym jetispei qaldy. Qysqasy, baiaýlaý qimyldap qaldym. Al odan keiin ózderińiz kýásizder, 140 kelini qatty jyldamdyqpen kóterdim.
– Ekinshi ret shyqqanyńda ózińe senimdi bolǵandaisyń…
– Ekinshi ret shyqqanymda esh qorqynysh bolmady. Qanshama jasaǵan daiyndyqtarymdy esime túsirip, ózimdi jiyp aldym. Bar kúshimdi jinadym. Eń bastysy, men ózime sengenim, jeńiske jeteledi dep oilaimyn.
– 140 keli salmaqty kóterý barlyǵyn sheshti. Osy mezette, kótere almai qalsam, ne isteimin degen oi keldi me?
– Ol jerde men bar kúshimdi salyp kótere bildim.
– Negizi, bastapqy maqsatyń altyn alý ma edi?
– Iá.
– Daiyndyq kezinde qanshany kóterip júrsiń?
– 120, 153 kóterip júrmin.
– Jattyǵýlarda kótergen salmaqty jarysta kóterý qiyn bolady ma eken?
– Joq, kóterýge bolady. Biraq biz jarys bolatyn ýaqyttyń 10,15 kún buryn aýyr salmaq kóterýdi toqtatamyz. Jarysqa bar kúshimdi salamyz. Qarsylastaryńnyń da qansha qandai salmaqty tańdaǵanyna mán beresiń. Uzaq jol júrgennen de azdap salmaqta ózgerister bolady. Ózimdegi kishkene jaraqatym bolǵandyqtan, sál tómendeý bop qaldy. Meniń, negizinen belim aýyrady. Oǵan qaramai daiyndyqty toqtatqan emespin.
– Bul jolǵy jeńisińniń júldesin qaida jumsaisyń?
– Endi bul jolǵy josparym erekshe. Sińilimdi emdetýge jiberem, al qalǵanyn ata-anam sheshedi.
– Turmysqa shyǵý oiyńda bar ma?
– Meniń bul Olimpiadadan altyn alam degen josparym bolǵan edi. Biraq ol buiyrmaǵandyqtan, qazir turmysqa shyqpaimyn (kúldi). Altyn medal alǵasyn turmys quramyn! Kelesi jyldan bastap, salmaq ózgeredi. Onyń qandai bolyp ózgeretindigim, aldaǵy ýaqytta belgili bolady. Bapkerlermen aqyldasamyz.
– Jarystaǵy mejeńdi oryndadyń. Endi demalysqa shyǵasyń ba?
– Iá. Men bul ýaqytta emdelemin dep otyrmyn.
Suhbattasqan Álihan Nurahmetuly
