Foto: Traveling.by
Jaz kelisimen Qazaqstanda dástúrli demalys maýsymy bastaldy. Biri teńizge asyqsa, endi biri el ishinde demalýdy qup kóredi, al úshinshileri jazdy úide ótkizýdi jón sanaidy. Osyǵan bailanysty Qoǵamdyq saiasat institýty qazaqstandyqtardyń demalys formaty, baǵyty men biýdjeti týraly zertteý júrgizip, shynaiy týristik kórsetkishtermen salystyrdy, dep habarlaidy Ult.kz.
Saýalnama nátijeleri ne deidi?
2025 jyly saýalnamaǵa qatysqandardyń 51,6%-y demalysta eshqaida barmaitynyn aitqan. Bul kórsetkish bir jylda 27,4%-ǵa ósken. 2024 jyly mundai jaýap bergender 40,5% bolsa, biyl olardyń úlesi edáýir artqan.
Demalysta eshqaida barmaýdyń negizgi sebepteri — qarjylyq shekteýler, ómir salty men jeke basymdyqtar. Ásirese aýyl turǵyndary, zeinetkerler, jumyssyzdar, úi sharýasyndaǵy áielder men tabysy tómen azamattar úide qalýdy jón kóredi.
Al 48,2% qazaqstandyq demalysqa shyǵýǵa nietti ekenin aitqan (taǵy 0,2% sheshim qabyldamaǵan).
Olardyń ishinde:
-
68,4% — ishki týrizmdi tańdaǵan;
-
12,8% — TMD elderine sapar shegýdi kózdeidi;
-
32,4% — shetelge (Túrkiia, BAÁ, Egipet, Tailand jáne t.b.) barǵysy keledi.
Eń tanymal sheteldik baǵyttar — Túrkiia, BAÁ jáne Egipet.
Bul úrdister Ulttyq statistika biýrosynyń 2024 jylǵy derekterimen sáikes keledi: sol jyly qazaqstandyqtar negizinen Reseige, Túrkiiaǵa jáne Ózbekstanǵa 5–15 kúndik saparlar jasaǵan. BAÁ – tórtinshi orynda, Egipet – jetinshi.
Demalysqa qansha qarajat bólinedi?
Saýalnamaǵa jaýap bergenderdiń:
-
26,1%-y — 100–200 myń teńge;
-
24,6%-y — 50–100 myń teńge jumsaýǵa daiyn.
Iaǵni, 50,7%-y bir adamǵa 200 myń teńgeden aspaityn biýdjetpen shektelmek. Bul top, negizinen, ishki jáne TMD elderine sapardy tańdaidy.
Al 19,2%-y — 200–400 myń teńge jumsaýǵa daiyn. Olar ortasha baǵaly sheteldik baǵyttarǵa qyzyǵýshylyq tanytady: Túrkiia, Egipet, Grýziia jáne TMD elderi.
