Senat tóraǵasy Máýlen Áshimbaev aýyl sharýashylyǵy salasyna qatysty zań jobalary týraly aitty, dep habarlaidy QazAqparat.
«1995 jyldan bastap aýyl sharýashylyǵy ónimderiniń jalpy kólemi 4,5 ese ósti. Aýyl sharýashylyǵy daqyldarynyń ónimdiligi 2 esege artty. Qazaqstan shetelge 7 mln tonnaǵa deiin bidai shyǵarý arqyly, álemdegi eń iri eksporttaýshylardyń qataryna qosyldy. Sońǵy 5 jylda aýyl sharýashylyǵy taýarlarynyń eksporty 50 paiyzǵa ulǵaidy. Sondai-aq, agroónerkásip keshenin damytýǵa arnalǵan aýqymdy baǵdarlamalar iske asyryldy. Aýyl sharýashylyǵy ónimin óndirýshilerdi qoldaý úshin aitarlyqtai qarajat bólinýde. Memleket basshysynyń byltyrǵy jáne biylǵy Joldaýlarynda aitylǵan tapsyrmalarǵa sáikes naqty jumystar qolǵa alyndy. Sonyń aiasynda qazan aiynda Agroónerkásip keshenin damytýdyń 2025 jylǵa deiingi Ulttyq jobasy bekitildi», - dedi M. Áshimbaev Senatta «Aýyl sharýashylyǵyn damytýdyń ózekti máseleleri men perspektivalary» taqyrybyna arnalǵan parlamenttik tyńdaýda.
Osy oraida ol Ulttyq jobany iske asyrý arqyly eńbek ónimdiligin 2,5 esege arttyrý josparlanǵanyn eske saldy. Qaita óńdelgen taýarlardyń úlesin 70 paiyzǵa deiin jetkize otyryp, agroónerkásip ónimderiniń eksportyn eki ese ulǵaitý, 500 myńǵa deiin jańa jumys oryndaryn ashý jáne aýyl sharýashylyǵynda eńbekaqyny eki ese kóbeitý kózdelip otyr.
«Bul josparlardy iske asyrý úshin tiisti quqyqtyq baza qajet ekeni túsinikti. Sondyqtan Parlament agrarlyq saladaǵy reformalardy zańnamalyq turǵydan qamtamasyz etý úshin Úkimetpen birlesip, nátijeli jumys istep keledi. Búginde Parlament depýtattarynyń bastamashyl bolýymen birqatar zań jobasy daiyndalýda. Solardyń biri - jaiylymdyq jerlerdi paidalaný jónindegi zańnamaǵa ózgerister engizý. Sońǵy kezderi bul elimiz boiynsha, ásirese, aýyl turǵyndary úshin óte ózekti másele ekeni belgili. Depýtattar bastamashyl bolǵan taǵy bir zań jobasy organikalyq ónimderge qatysty. Jalpy, organikalyq azyq-túlik óndirýde bizdiń aýyl sharýashylyǵynyń áleýeti zor. Sondyqtan senatorlar osy baǵyttaǵy memlekettik qoldaýdyń jańa sharalaryn usynyp otyr. Taiaýda depýtattar qabyldaǵan 2022-2024 jyldarǵa arnalǵan respýblikalyq biýdjette úsh jyldyq kezeńde aýyl sharýashylyǵyn damytýǵa 524 mlrd teńge qarastyryldy», - dedi Senat tóraǵasy.
