QR Ekologiia, geologiia jáne tabiǵi resýrstar ministri Serikqali Brekeshev Qazaqstan men Reseidiń XVII óńiraralyq yntymaqtastyq forýmynda Jaiyqtyń ekojúiesin qalpyna keltirý baǵytynda atqarylyp jatqan sharýalarǵa toqtaldy, dep habarlaidy QazAqparat.
«Qazirgi ýaqytta Jaiyq sýynyń ortaiý úrdisi jáne onyń ekojúiesindegi ahýaldyń nasharlaýy eleýli alańdaýshylyq týǵyzyp otyr. Shekara mańy yntymaqtastyǵynyń 16-shy forýmynda berilgen tapsyrma boiynsha biz Jaiyq pen Ertis ózenderin ekologiialyq saýyqtyrý jónindegi baǵdarlamalarǵa, sondai-aq barlyq transshekaralyq ózenderdi birlesken gidrologiialyq turǵyda zertteý jónindegi biryńǵai jol kartasyna qol qoidyq», - dedi Serikqali Berkeshev.
Onyń aitýynsha, biylǵy birinshi jartyjyldyqta qos tarap Jaiyq pen Ertistiń gidrologiialyq derekterin jinap, almasqan.
«Qos el sarapshylary ózen sýynyń ár jylda árqalai bolatynyn eskere otyryp, baqylaý tustamalaryna deiin sýdyń kelý ýaqytyn esepteýge kirisip ketti. Biryńǵai jol kartasy Jaiyq ózeniniń gidrologiialyq rejimin, onyń ishinde sý qoimalarynyń jumys rejimi esebinen jaqsartý boiynsha júieli sharalar ázirleýge múmkindik beredi. Kúsh biriktirý arqyly biz ózenge tastalatyn tógindilerdiń kólemin azaityp, jaǵalaý aimaǵyndaǵy kóne lastaný oshaqtaryn joiýǵa, sý túbin tereńdetý jumystaryna jáne ózen arnasyn tazartýǵa, ózen qaptalyndaǵy ormandar men ýyldyryq shashatyn jerlerdi qalpyna keltirýge kúsh salamyz», - dedi ministr.
