QR Premer-Ministriniń orynbasary Roman Skliar elimizdiń batys óńirindegi sý resýrstary máselesiniń sheshý joldaryn aityp berdi, dep habarlaidy QazAqparat.
«Jaiyq ózeniniń ekologiialyq jaǵdaiy Úkimettiń erekshe baqylaýynda. Sońǵy jyldary jaýyn-shashyn kóleminiń azdyǵyna bailanysty Jaiyqtyń jaǵdaiy qiyndap barady. Sondai-aq, Saǵyz, Oiyl, Jem ózenderiniń sýy da tartylyp barady. Osy oraida atalǵan máseleni sheshý úshin tiisti sharalar qabyldanady», - dep jaýap qatty Roman Skliar Jaiyq ózeniniń taǵdyryna qatysty depýtattyq saýalǵa.
Úkimet basshysynyń orynbasary Jaiyq ózenin erekshe memlekettik qorǵaýǵa alýǵa qatysty pikir bildirdi.
«Sońǵy ýaqytta Jaiyq ózenin memlekettiń erekshe qorǵaýyna alý máselesi jii qozǵalyp júr. Osy tusta ózenniń negizgi aǵysy Jaiyqtyń joǵary bóliginde, iaǵni Resei Federatsiiasy jaǵyna tiesili ekenin aityp ótken jón. Jaiyq ózeni basseinindegi sý sharýashylyǵy salasyn úilestirý 1996 jylǵy 20 maýsymdaǵy transshekaralyq sý nysandaryn qoldaný jáne qorǵaý týraly ortaq hattamaǵa sáikes anyqtalǵan. 50% qamtamasyz etý – 7,79 tekshe metr, 75% qamtý – 5,360 tekshe metr jáne 95% qamtamasyz etý – 2,97 tekshe metr», - deidi ol.
Depýtattyq saýalǵa berilgen jaýapta aitylǵandai, 2017-2020 jyldary Jaiyq ózeniniń jyldyq aǵysy 10,6 tekshe metrden 4,5 tekshe metrge deiin azaiǵan.
«Soǵan qaramastan Jaiyq ózeniniń jyl saiynǵy sýdyń jinalýy 0,5 tekshe metrdi quraidy. Sondyqtan da Jaiyq ózenin erekshe memlekettik qorǵaýǵa alý máselesi Reseimen ekijaqty qarastyrylyp jatyr. Al ózenniń sý sharýashylyq jaǵdaiy men ekologiialyq júiesin sheshý Qazaqstan-Resei arasyndaǵy 2021-2024 jyldarǵa arnalǵan transshekaralyq sý nysandaryn qoldaný jáne qorǵaý týraly yntymaqtastyq baǵdarlamasy aiasynda sheshiledi», - dedi R.Skliar.
