Jatyr moiny qaterli isigimen aýyratyndar jyl ótken saiyn jasaryp kele jatyr. Bul týraly QR Densaýlyq saqtaý ministrliginiń bas onkolog dárigeri, Qazaq ulttyq onkologiia jáne radiologiia institýtynyń direktory Diliara Qaidarova Instagram paraqshasynda ótken tikelei efirde aitty, dep habarlaidy QazAqparat.
«Jatyr moiny qaterli isiginiń paida bolýyna sebep bolatyn negizgi faktor – adamnyń papilloma virýsy. Bul týraly búgingi tańda búkil álem biledi. Adam papilloma virýsynyń 16 jáne 18-tipi jatyr moiny qaterli isigin týdyrady. Bizdiń memlekette adam papilloma virýsyna arnalǵan skrining joq, sol sebepti áielder turaqty túrde dárigerge baryp, qaralyp turýy kerek», - deidi bas onkolog dáriger Diliara Qaidarova.
Onyń aitýynsha, serigin jii aýystyrý jáne basqa da sebepter bul aýrý túriniń paida bolýyna sebepshi bolady.
«Qorǵanys quraldaryn qoldanbaǵan jynystyq qatynas, adam boiynda bakteriialyq jáne virýstyq ártúrli infektsiia bolýy jatyr moiny qaterli isiginiń paida bolýyna ákep soǵady. Jynystyq qatynaspen tym erte ainalysatyn qyzdar ártúrli infektsiia, virýs juqtyryp alady. Sonyń saldarynan jatyr moiny zaqymdalady. Ondai boijetkenderde 10, 15, 20 jyl kóleminde qaterli isik derti paida bolýy múmkin. Negizi bul aýrý túrimen 40 jastan asqandar aýyrady, biraq jyl ótken saiyn jatyr moiny qaterli isigi jasaryp keledi. Bizge 1992 jylǵy qyzdar osy dertpen keledi», - deidi ol.
