Foto: Akorda.kz
Memleket basshysy ortalyqaziialyq áriptesterimen birge Germaniia ekonomikasy Shyǵys komitetiniń (GEShK) dóńgelek ústeline qatysty, dep habarlaidy "Ult aqparat" Aqordanyń resmi saityna silteme jasap.
Qasym-Jomart Toqaev Ortalyq Aziia elderi men Germaniianyń ekonomikalyq yntymaqtastyǵynyń negizgi máselelerine toqtaldy.
– Bizdiń aimaq – Eýraziia keńistigin bailanystyrýshy biregei strategiialyq ortalyq. Negizgi saýda-ekonomikalyq dálizder elderimizdiń aýmaǵy arqyly ótedi. Qazaqstanda mol paidaly qazbalar qory bar. Munyń bári Germaniiamen jáne jalpy Eýropa Odaǵymen saýda-investitsiia salasyndaǵy yntymaqtastyqty nyǵaitýǵa keń jol ashady, – dedi Qasym-Jomart Toqaev.
Memleket basshysy Germaniiamen aradaǵy aimaqtyq saýda-ekonomikalyq bailanystarda Qazaqstannyń mańyzdy ról atqaratynyn atap ótip, ózara qarym-qatynasty nyǵaitý jáne ony jańa deńgeige shyǵarý jóninde birqatar usynys aitty.
– Biz mańyzdy shikizat taýarlary salasyndaǵy yntymaqtastyqty keńeitýge múddelimiz. Búginde sirek kezdesetin metaldarǵa álemdik suranys usynystan edáýir kóp. Memleketterdiń bolashaqtaǵy tehnologiialyq damýy osy úrdisti kúsheite túsedi. Qazaqstan Ortalyq Aziianyń basqa memleketteri siiaqty, Eýropa Odaǵyna qajetti asa mańyzdy metaldar men mineraldardyń orasan zor qoryna ie. Olardy birlesip óndirýde ǵana emes, qaita óńdeý isinde de bul baǵyttyń perspektivasy zor, – dedi Qasym-Jomart Toqaev.
Memleket basshysy kezdesý qatysýshylaryna jýyrda germaniialyq HMS Bergbau kompaniiasynyń basshylyǵymen geologiialyq barlaý jumystaryn júrgizý jáne aldaǵy ýaqytta litii óńdeý keshenin salý týraly ýaǵdalastyqqa qol jetkizilgeni jóninde málimet berdi. Investitsiia kólemi – 500 million dollar.
– Ónerkásip salasyndaǵy yntymaqtastyǵymyz da múlde jańa deńgeige kóterilip keledi. Linde kompaniiasynyń karbamid óndirisine arnalǵan gazdy tolyq óńdeý jobasyn júzege asyrý bul iske tyń serpin beredi. Investitsiianyń jalpy kólemi 1,4 milliard teńgege baǵalanyp otyr, – dedi Prezident.
Memleket basshysynyń pikirinshe, kómirsýtegi shikizatyn jetkizý, jahandyq azyq-túlik qaýipsizdigin kúsheitý, kólik-tranzit jáne qarjy salalaryndaǵy kooperatsiia ózara qarym-qatynastyń basqa da basym baǵyttarynyń qataryna kiredi.
Prezident kezdesýge qatysýshylardyń nazaryn ornyqty damý jáne jasyl ekonomika salalarynda birlese jumys isteýdiń mańyzdylyǵyna aýdardy.
– Qazaqstan aimaqtyq klimat máselesin ilgeriletýge jan-jaqty atsalysýǵa daiyn. Biz nemis seriktesterimizdi 2026 jyly BUU aiasynda Qazaqstanda ótetin Aimaqtyq klimattyq sammitke qatysýǵa shaqyramyz. Biz 2060 jylǵa qarai kómirtegi beitaraptyǵyna qol jetkizý jóninde mindetteme aldyq. Alaida ol úshin bizge ekonomikany aitarlyqtai jańǵyrtyp, «jasyl» tehnologiiaǵa 600 milliard dollardan astam investitsiia tartý qajet, – dedi Qasym-Jomart Toqaev.
Prezident sóziniń sońynda atalǵan kezdesýdiń qorytyndysy Ortalyq Aziia elderi men Germaniia arasyndaǵy ekonomikalyq yntymaqtastyqtyń kókjiegin keńeitetine senim bildirdi
Jiynda aimaq memleketteri basshylarymen qatar, Germaniia ekonomikasy Shyǵys komitetiniń basqarma tóraǵasy Katrina Klaas-Miýlhoizer, sondai-aq Linde, Knauf, Aurubis, German Seed Alliance GmbH, Ernst Klett AG jáne basqa da nemis kompaniialarynyń top-menedjerleri baiandama jasady.
