17-18 qyrkúiek aralyǵynda Pavlodarda «Jastar uiymdarynyń netvorkingi jáne tájiribe almasýy» jobasy ótti. «Bolashaq» Qaýymdastyǵy bastama bolǵan netverkingke SQO, Qostanai oblysy, Pavlodar oblysynan 18-29 jas aralyǵyndaǵy 200-den astam belsendi jas qatysty.
«Jastar uiymdarynyń netvorkingi jáne tájiribe almasýy» jobasy buǵan deiin elimizdiń tórt aimaǵyn qamtydy. Onda ár óńirden 1000-nan astam belsendi, kóshbasshy azamat bas qosty.
Soltústik óńirinde ótken sharaǵa Pavlodar oblysy ákiminiń orynbasary Ashat Oralov, «Bolashaq» Qaýymdastyǵynyń atqarýshy direktory Laýra Demesinova, «United States/Kazakhstan Trade Council» direktory Devid M. Valera, «Global Procurement Company» direktory Oljas Súleimenov, «Sandi Sultan TeleLab-SS Lab» laboratoriiasynyń negizin qalaýshy, telejúrgizýshi Sándi Sultan qatysyp, sóz sóiledi.
«Netvorkingke soltústik óńiriniń eń belsendi jastary jinalyp otyr. Olar osy sharadan ózderine qajetti mańyzdy aqparattar alyp, keleshekte óz eńbek jolynda júzege asyrady degen oidamyn», - deidi Ashat Oralov.
Eki kúnge ulasqan netvorking aiasynda «ÚEU + biznes = jastarǵa arnalǵan múmkindikter», «Jastar saiasatynyń ózekti trendteri», «Jastarǵa arnalǵan áleýmettik jobalardy iske asyrý» siiaqty túrli taqyryptarda talqylaýlar boldy.
Soltústik Qazaqstan, Qostanai, Pavlodar oblysy jastary úshin arnaiy master-klass, seminar, treningter uiymdastyryldy. Qatysýshylar túrli baǵdar boiynsha tájiribe almasyp, jańa jobalardy pysyqtap, onyń tiimdiligi men el ekonomikasyna tigizer áserin talqyǵa saldy.
Shara sońynda «Bolashaq» Qaýymdastyǵy «Jastar uiymdarynyń netvorkingi jáne tájiribe almasýy» jobasyna qatysqan belsendi jastarǵa sertifikattar tabystady.
Aita ketsek, «Bolashaq» Qaýymdastyǵy atalǵan jobany QR Aqparat jáne qoǵamdyq damý ministrligi men Pavlodar oblysy ákimdiginiń qoldaýymen, «Azamattyq bastamalardy qoldaý ortalyǵy» KEAQ-nyń memlekettik granty sheńberinde uiymdastyrdy. Sondai-aq shara qorytyndysy boiynsha ÚEU men JRO-nyń eń úzdik qazaqstandyq tájiribesi negizinde arnaiy jinaq jaryq kóredi.
