Shymkentte elimizdiń belsendi jastary «Jastar uiymdarynyń netvorkingi jáne tájiribe almasýy» jobasy aiasynda bas qosty. Eki kúnge jalǵasqan sharaǵa 200-den astam belsendi jas qatysty.
Netvorkingke Qyzylorda, Túrkistan, Jambyl oblystary men Shymkent qalasynan ÚEU men JRO ókilderi keldi. Joba aiasynda jastar elimizge tanymal tulǵalarmen kezdesip, pikir almasty.
Shara barysynda «Jastar qyzmetkerleri qaýymdastyǵynyń» tóraǵasy Nurlybai Naýryzbaev «Jastar ÚEU-nyń turaqty damýy men tiimdiligin arttyrý» atty master-klass ótkizdi.
«Ár óńirden kelgen jastar óz bilim-biligimen bólisý maqsatynda bir jerge toǵysyp, oi almasyp jatyr. Kóp jastar óz isin bastaýda baǵyt-baǵdaryn aiqyndamai, kerekti aqparatqa qol jetkize almai jatady. Osy tusta óziniń naqty jobasy, ideiasy bar jastarǵa bul shara úlken múmkindik ashady. Uiymdastyrylyp jatqan is-sharanyń qundylyǵy, mańyzy osynda dep oilaimyn», - deidi Nurlybai Naýryzbaev.
Nurlybai Naýryzbaevtyń aitýynsha, elimizde bos ýaqytyn paidaly isterge jumsap, qoǵamdyq jumystarǵa belsene aralasyp júrgen jastardyń qatary kún sanap ósip keledi.
Sondai-aq spiker jastar jumysyndaǵy negizi 9 mindetti atap, olardyń máni men mańyzyn túsindirdi.
2018 jyldyń 1 jarty jyldyǵyndaǵy jaǵdai boiynsha úkimettik emes uiymdar sany 933-ke jetken. Onyń ishinde Batys Qazaqstan oblysy ÚEU eń kóp ornalasqan aimaq retinde alǵashqy oryndy ielenedi.
Jastar master-klassqa belsene qatysyp, ózderin tolǵandyrǵan saýaldarǵa da jaýap aldy.
Shara aiasynda óz jobalary jóninde baiandap, spiker keńesine júgingen qatysýshylar qatary az bolmady.
Sonymen qatar netvorkingke Qytaidaǵy Qazaqstan stýdentteri qaýymdastyǵynyń tóraiymy Nazgúl Maqulbek arnaiy qatysty. Ol belsendi jastardy Qytaida da birigip jumys jasaýǵa shaqyrdy.
«Qytaida bilim alyp jatqan soń Qazaqstandaǵy jastardyń belsendiligi, qandai jobalardy júzege asyryp jatqany men úshin qyzyq. Sondyqtan osy sharaǵa eldegi jastarmen tyǵyz qarym-qatynas ornatyp, tájiribe almasý maqsatynda keldim. Óte mańyzdy aqparattar aityldy. Aldaǵy ýaqytta elge oralyp, túrli birlestiktermen jumys jasaityn kezde jinaǵan tájiribemiz bizge úlken kómek bolary sózsiz», - deidi Qytaidaǵy Qazaqstan stýdentteri qaýymdastyǵynyń tóraiymy Nazgúl Maqulbek.
Aita keteiik, «Bolashaq» Qaýymdastyǵy «Jastar uiymdarynyń netvorkingi jáne tájiribe almasýy» jobasyn QR Aqparat jáne qoǵamdyq damý ministrliginiń qoldaýymen, «Azamattyq bastamalardy qoldaý ortalyǵy» KEAQ-nyń memlekettik granty sheńberinde uiymdastyrdy.
Atalmysh joba aldaǵy ýaqytta Pavlodar óńirinde jalǵasyn tabady. Joba nátijesi boiynsha ÚEU men JRO-nyń eń úzdik qazaqstandyq tájiribesi negizinde arnaiy jinaq jaryq kóredi.
