Elbasynyń byltyrǵy «Qazaqstandyqtardyń ál-aýqatynyń ósýi: tabys penturmys sapasyn arttyrý» atty halyqqa Joldaýyndaǵy igi bastamalardyń biri osy 2019 jyldy «Jastar jyly» dep jariialaýy edi. Mine búginde jurt bolyp qoldaǵan sol bastamany resmi túrde júzege asyrýdyń alǵashqy qadamy jasaldy.
Elbasynyń qatysýymen Elordada «Jastar jylynyń» resmi ashylý saltanaty ótti. Oǵan ár salada jemisti eńbek etip júrgen jastar ókilderi, tipti, shet elderde turatyn qandastarymyzdyń shaqyrylýy bul igi sharanyń aýqymdylyǵyn aiǵaqtaidy. Jiynda kóterilgen máseleler men aitylǵan usynystardyń qai-qaisysy da – ózekti. Endi sol usynystar negizindi naqty baǵdarlamalar ázirlenip, jer-jerlerde, tipti el aýmaǵynan tys, qazaq diasporalary turatyn shet elderde de júzege asýy tiis.
«Jastar jylyn» jariialaýdy nege qoldap, bul bastamaǵa qýanyp otyrmyz? Onyń birneshe sebebi bar. Eń bastysy, bul – bolashaqty oilaýdan týǵan is. Qai zamanda bolmasyn qoǵamnyń qozǵaýshy kúshi, alǵa jeteleýshisi – jastar. Jastar degende tyń ideialar, sony bastamalar oiǵa oralady. Elimizdiń endigi damý kókjiegin keńeitetin de osy jastar. Demek, qazir qýaty tasyǵan, eńseli elimiz eń aldymen jastardy qoldap, olarǵa memlekettik deńgeide demeý kórsetýi – zańdylyq.
Jastarymyz da Otannyń osy qamqorlyǵyn tereń sezinip, ozyq bilimimen, adal eńbegimen laiyqty jaýap qaitarady degen oidamyn. Bul oiymnyń qate emestigine, jastardyń Elbasy senimin aqtaitynyna búgingi ótken jiyndy, ondaǵy jalyndy jastardy kórip, taǵy bir kóz jetkizdim. «Jastar jyly» jarqyn ister jyly bolsyn degim keledi.
Batyrbek MYRZABEKOV,
«Qurmet» ordeniniń iegeri,
Qazaqstan Jazýshylar odaǵynyń múshesi,
Qazaqstannyń Qurmetti jýrnalisi
