(«Jastar uiymdarynyń netvorkingi jáne tájiribe almasýy» jobasy, Oral qalasy)
«Bolashaq» Qaýymdastyǵynyń bastamasymen jastar ortalyqtarynyń eń úzdik qazaqstandyq tájiribesi negizinde arnaiy jinaq jaryq kórdi.
Biyl «Bolashaq» Qaýymdastyǵy elimizdiń 17 aimaǵynda «Jastar uiymdarynyń netvorkingi jáne tájiribe almasýy» jobasyn uiymdastyrdy. Joba qorytyndysy boiynsha eń tańdaýly jobalar toptastyrylǵan jinaq kópshilik oqyrmanǵa jol tartty.
Atalmysh jinaqta áleýmettik, qaiyrymdylyq, tanymdyq, patriottyq baǵyttaǵy jobalar jaiynda mańyzdy málimetter qamtylǵan. Úkimettik emes uiymdar men Jastar resýrstyq ortalyqtarynyń tańdaýly jobalary qazaq jáne orys tilderinde jinaqtalǵan.
«Búginde jastardyń qoǵamdyq belsendiligi, jobalary jóninde tolyqqandy aqparat kóp emes. Bul jinaq mundai qajettilikterdiń ornyn toltyryp, mańyzyn arttyra túsedi. Jinaqta ÚEU men JRO-nyń jumystary, jas kásipkerlerdiń, erikti jastardyń qyzyqty jobalary jáne úzdik tájiribeleri jinaqtalǵan. Jastar jinaqtan ózine qajetti dúnieler alyp, keregine jarata alsa, bizdiń mindettiń oryndalǵany. Osy rette Jastar jyly aiasynda uiymdastyrylǵan jobaǵa belsendi atsalysqan barlyq azamattarǵa alǵys bildiremin», - deidi «Bolashaq» Qaýymdastyǵynyń atqarýshy direktory Laýra Demesinova.
Tuńǵysh ret uiymdastyrylǵan netvorkingke Nur-Sultan, Oral, Almaty, Shymkent jáne Pavlodar qalalarynan 1100-den astam jas belsendi qatysty. Jiynǵa kelgen jastar biznes bastaýdaǵy negizgi qaǵidalar, ÚEU tiimdiligin arttyrý jáne jastar saiasatyndaǵy aýqymdy máseleler sekildi ózekti taqyryptardy talqylady. Sondai-aq aldaǵy ýaqytta eki jaqty bailanysty arttyrý, tájiribe almasý maqsatynda jańa jobalardy birlese júzege asyrýǵa niet bildirdi.
Aita keteiik, jinaq QR Aqparat jáne qoǵamdyq damý ministrliginiń qoldaýymen, «Azamattyq bastamalardy qoldaý ortalyǵy» KEAQ memlekettik granty sheńberinde «Bolashaq» Qaýymdastyǵynyń uiymdastyrýymen jaryq kórip otyr.
