Foto depýtattyń Instagram paraqshasynan alyndy
Májilis depýtaty Rinat Zaiytov jastar tárbiesine teris áser etip jatqan, qylmysty nasihattaityn filmder jaily oiyn aitty, dep habarlaidy Kazinform.
«Osyndai mazmundaǵy filmderdi ideologiialyq qarý dep baǵalaýǵa bolady. Mundai filmder óskeleń urpaqqa óte qatty áser beredi. Óitkeni balalardyń sanasy áli qorǵana qoimaǵan, osyndai filmderdegi kórinisterdiń bárin óz boiyna sińirip alady. Ekrannan ne kórse, soǵan qumar bolady. Mundai mazmundaǵy filmder men serialdar keiingi jyldary elimizde de túsirilgen, sondai-aq beimádeni sheteldik filmder de barshylyq. 20 jyl buryn «Brigada» degen serial shyǵyp, onyń keiipkerleri jasóspirimderge qatty áser etkenin bilemiz. Jastar solardyń laqap atyn qoiyp alyp, eliktep júrdi. Sondyqtan bul jaǵdaidy qaýipti dep sanaimyn», - dedi Zaiytov.
Bul turǵyda depýtat elimizde osyndai jaǵdailardyń aldyn alyp, ideologiialyq jaǵynan jaqsy serialdar men filmderdiń sanyn kóbeitý mańyzdy ekenin atap ótti.
«Ministrliktiń bul baǵytta monitoring júrgizetindei shamasy bar. Urpaqqa, ultqa ziiany tietin, jastardyń bilim alýyna bóget jasaityn teris ideologiiaǵa qarsy turyp, osy máselelerge erekshe mán berýimiz kerek», - dedi depýtat.
Eske salaiyq, jaqynda QR Ishki ister ministrligi ákimshilik politsiia komiteti tóraǵasynyń orynbasary Renat Zulqaiyrov balalar men jasóspirimder tárbiesine keri áser etip jatqan filmder men serialdardy atap shyqqan edi.
«Balalar táýlik boiy internetti, áleýmettik jelilerdi qarap otyrady. Munda eń tanymal kontent retinde birinshi orynǵa zorlyq-zombylyq, dórekilik pen túrli prankter shyǵyp otyr. Sonymen qatar, keiingi kezderi kámeletke tolmaǵandardyń minez-qulqyna «Chernyi dvor», «Patsanskaia istoriia», «Taraz», «Slovo patsana» siiaqty tanymal filmder keri áser etip jatyr», - dedi Zulqaiyrov.
