Jastar arasyndaǵy jumyssyzdyq kórsetkishi tómen. Bul týraly QR Eńbek jáne halyqty áleýmettik qorǵaý vitse-ministri Erjan Birjanov aitty, dep habarlaidy QazAqparat.
«Jastardyń jeke sanaty óte mańyzdy. Bizge, elimizge sapaly jumys kúshi qalýy qajet. Eger jastarymyz elimizde óz ornyn tappasa, onda olar basqa memleketke ketip qalýy múmkin. Sondyqtan árbir túlek biz úshin óte mańyzdy. Jastarǵa arnalǵan granttar, jastar tájiribesi, alǵashqy jumys orny – munyń barlyǵy da jastarǵa arnalǵan baǵyttar. Ózekti baǵyttar boiynsha jastarǵa arnalǵan kýrstar da solar úshin daiyndalady.Jastar arasyndaǵy jumyssyzdyq kórsetkishi basqa sanattarǵa qaraǵanda birshama tómen. Búginde ol 3,8 paiyzdy quraidy», - dedi Erjan Birjanov.
Onyń atap ótýinshe, jastardyń qajettiligi keide naryq múmkinshiliginen de asyp túsedi.
«Biz naryqtyq ekonomika jaǵdaiynda ómir súrip jatyrmyz. Búginde jalaqyny naryq retteidi. Eger adamnyń daǵdysy ári qabileti bolsa, onda ol mamandyǵyn tabady, túiindeme bazasy óte úlken. Qazirgi ýaqytta 120 myńnan astam bos jumys orny bar. Búginde meditsina qyzmetkerlerine, muǵalimderge, ásirese aǵylshyn tiliniń repetitorlaryna suranys joǵary. Bastapqy bilimi bar adamdar qaita oqýy qajet. Olardyń munan arǵy taǵdyry jáne eńbek qyzmeti soǵan bailanysty», - dedi vitse-ministr.
