Qazaqstandyq Dias Bahriddin Býenos-Airestegi jasóspirimder Olimpiadasynda kanoe esýden chempion atandy, - dep habarlaidy Olympic.kz.
Irikteý kezeńinde Dias márege ekinshi bolyp kelse, shirek finalda ýkrainalyq sportshyny artta qaldyrdy.
Jartylai finalda ol majarstandyq Balaza Palladan ozdy. Pallanyń ýaqyt kórsetkishi - 1:57.04, Diastyń nátijesi - 1:54.66.
Finalda ol ózbek sportshysy Islomjon Abdýslomovpen altynǵa talasqan bolatyn. Tartysty ótken jarysta Dias 1:54.66 ýaqyt kórsetkishimen márege birinshi bolyp keldi. Abdýsalomovtyń ýaqyt kórsetkishi - 1:55.17.
«Ózderińiz kórgendei jarys óte qiyn boldy. Degenmen jeńiske jettik. Finalda bar kúshimdi jinap, jeńiske jetýge tyrystym. Ózbekstandyq qarsylasym myqty sportshy. Talai básekelerde jarysyp júrmiz. Búgingi tańda jasóspirimder arasyndaǵy Olimpiada oiyndaryndaǵy medalim sporttyq mansabymdaǵy basty jetistigim. El qorjynyna medal salǵanym úshin óte qýanyshtymyn», - dedi kanoe esýden jasóspirimder Olimpiadasynyń jeńimpazy Dias Bahriddin.
