Jasandy intellekt kompaniialar men óndiris oryndaryna ǵana emes, halyqqa da zor paidasyn tigize alatyn kúshke ie. Jas kásipkerler tolqyny innovatsiialyq tehnologiiany qoǵamnyń paidasyna jaratý arqyly orasan zor ózgerister ákele alady.
Búgingi tańda jasandy intellekt atqarýshy bilik pen korporativtik salalarda sheshim qabyldaý protsesinde keń qoldanys tapqan. Jasandy intellekt quraldary kommertsiiaǵa kóbirek paidalanylǵanymen, onyń áleýmettiń jaǵdaiyn jaqsartýda da paidasy mol.
Osy maqsatta Masachýssets tehnologiia institýty Solve jáne the Patrick J. McGovern qorynyń birikken jobasyna nazar salsaq, jasandy intellektini ekonomikalyq álsiz toptardyń jaǵdaiyn jaqsartýǵa qoldanýǵa bolady. Kásipkerler toby jasandy intellektiniń kómegimen álemdegi kóptegen qordalanǵan suraqtardyń tyń sheshimin izdestirýde.
Jasandy intellektiniń tiimdi tusy – iri kólemdegi málimetterdi saraptamadan ótkizip, derekter arasyndaǵy bailanysty asqan naqtylyqpen kórsetip, sońǵy sheshimdi adamnyń ózine qaldyrady. Adam men mashinanyń osyndai seriktestigi áleýmettik máselelerdi sheshýde erekshe yqpalǵa ie. Sebebi, etnikalyq toptar qarama-qaishylyqqa túsip jatqan qoǵamda ońtaily sheshim shyǵarý úshin aqparatty barynsha obektivti saraptaýdyń mańyzy joǵary.
Máselen, azamattardyń qarjylyq jaǵdaiy men tólem jasaý qabiletin aitar bolsaq, olardyń jeke banktik esepshottary bolmasa, ipoteka nemese kredittik karta alýy múmkin emes. Bankte akkaýnttary joq azamattar ózderiniń tólem jasaýǵa qabiletti ekenin kommýnaldy qyzmetterdi tólegen kvitantsiialary men telefondaǵy chekteri arqyly da dáleldei alady.
Jasandy intellektke negizdelgen Destácame baǵdarlamasy Chili men Meksikadaǵy 1,3 million halyqqa qyzmet kórsetedi. Ol nesie berý uiymdarynda tirkelmegen derekterden alternativti nesie upailaryn quraityn algoritm qoldanady. Osylaisha, klienttiń ipotekany tóleýge qabiletti jaily derekter jinaidy, sodan keiin qarjylyq uiymdar olarǵa nesie berý múmkindigin qarastyrady.
Sonymen qatar, jasandy intellekt bilim berý men densaýlyq saqtaý salasynda joǵary sapaly qyzmettiń qunyn arzandatyp, nátijeni jaqsartýǵa septesedi. Century Tech bilim berý platformasynda muǵalimderdiń kúndelikti qaitalanatyn jumystary men ákimshilik tapsyrmalaryn avtomattandyrady. Sondai-aq árbir stýdenttiń bilim alý qabiletine sai, arnaiy oqý baǵdarlamasyn qurastyrady, sáikesinshe olar oqý úlgerimin jaqsarta alady.
Taǵy bir mysal, Ada Health baǵdarlamasy naýqastar men densaýlyq saqtaý qyzmetkerlerine qatar qyzmet kórsetedi. Onyń interfeisi naýqaspen sóilesip, onyń hál jaǵdaiyn saraptamadan ótkizedi. Sodan keiin baǵdarlama birden naýqasqa kerekti meditsinalyq nusqaýlardy beredi. Bul baǵdarlamada meditsinalyq derekter jasandy intellektimen basqarylyp, meditsinalyq sheshim qabyldaidy jáne qoǵamdyq densaýlyq saqtaý qyzmetkerliriniń, farmatsevt, meiirbike jáne felsherlerdiń ornyn basa alatyn qabiletke ie. Bul meditsinalyq qyzmetkerler sany tapshy aýdandarda óte mańyzdy ról atqaryp, naýqastarǵa kásibi kómek kórsetýge múmkindik beredi.
ISeeChange platformasy qoldanýshynyń aitqan sózin tani alady jáne sensorly júieniń arqasynda qalalardyń klimattyq turaqtylyǵyn saqtaýǵa, infraqurylymdy josparlaýǵa, tipti qoǵamdyq qaýipsizdikti de baqylaýǵa qoldanylady. Turǵyndar platformaǵa óz aýdandary týraly maǵlumatty aýyzsha aitady, mashina aitylǵan derekti bir arnaǵa biriktirip, klimattyq modelder qurastyrady.
Crisis Text Line jasandy intellekti daǵdarys ortalyǵyna habarlasqan jasóspirimderdiń ómirden túńilý belgileri bar habarlama mátinderin saraptamadan ótkizedi. Baǵdarlama tez arada kómek kórsetý kerek qaýipti aimaqtaǵy adamdardy anyqtaidy. Jasandy intellekt iri kólemdegi derekterdi óńdeý arqyly eń birinshi kezekte kimge jaýap qaitarý kerektigin kórsetedi. Mysaly, «ibýprofen» sózin qoldanǵan adamnyń ózine ziian keltirý yqtimaldylyǵy joǵary ekendigin belgili bolǵan. Osylaisha jasandy intellekti osy sóz kezdesetin habarlamalarǵa birinshi kezekte kóńil bóledi. Al túsindirý jumystaryn erikti konsýltant psihologtar jasaidy.
Joǵarydaǵy mysaldar jańa biznes modelderi úlken derekter (big data) men jasandy intellekt tehnologiialarynyń qundylyǵyn arttyrýǵa bolatynyn kórsetti. Sol sebepti MTI Solve jáne the Patrick J. McGovern qory tize qosyp, ǵalamdyq problemalardy sheshýge talpynǵan tehnologiia salasynyń kásipkerlerine qoldaý kórsetedi. Olar tehnologiia startaptaryn alǵashqy kezeńinen bastap anyqtap, ósip damýyna, qoǵamnyń igiligine paidalanatyn dúnie shyǵarýyna jaǵdai jasaidy. Solve daiyndaǵan arnaiy qazylar alqasy tehnologiia salasynyń kásipkerler tobyn alda bolatyn Solve Challenge Finals saiysyna irikteidi.
Eger jasandy intellekt muqtaj adamdardyń qyzmetine berilse, ol milliardtaǵan adamnyń ómirin jaqsartatyn potentsialǵa ie. Bul óz kezeginde jasandy intellekt tek aýqattylardyń ǵana qaltasyn qalyńdatýǵa arnalǵan qural degen túsinikti túbirimen joiady. Tehnologiiany qoǵamnyń damýyna jumyldyrǵan kásipkerler uzaq ýaqytqa áser etetin, orasan zor ózgeristerge sep bola alady.
Maqalanyń túpnusqasy: weforum.org
