Foto: Aqorda
Memlekettik keńesshi Erlan Qarinniń tóraǵalyǵymen Shetelde kadrlar daiarlaý jónindegi respýblikalyq komissiianyń kezekti otyrysy ótti, dep habarlaidy Ult.kz.
Biyl «Bolashaq» stipendiiasyn taǵaiyndaý konkýrsynyń erejeleri ózgerdi. Úmitkerler úsh kezeńnen turatyn irikteýden ótedi: keshendi testileý, suhbat jáne Respýblikalyq komissiianyń eń joǵary upai jinaǵan qatysýshylardy irikteýi. Sondai-aq bir kúntizbelik jyl ishinde konkýrsqa qaita qatysýǵa bolady. Bul áleýetti úmitkerler qataryn kóbeitip, olardyń baǵdarlamada baǵyn synap kórýine qosymsha múmkindik usynady.
Konkýrs qorytyndysy boiynsha komissiia elimizdiń 225 azamatyna halyqaralyq «Bolashaq» stipendiiasyn taǵaiyndaý týraly sheshim qabyldady. Orta eseppen bir orynǵa 4 úmitkerden keldi. Sonymen qatar biyl sheteldik joǵary oqý oryndary men ǵylymi ortalyqtarǵa qoiylatyn talaptar ózgerdi. Iaǵni olar mindetti túrde bedeldi halyqaralyq reitingterdiń úzdik júzdigine engen bolýy kerek. Bul «Bolashaq» stipendiiasy aiasyndaǵy akademiialyq bilim sapasyn arttyrýǵa jol ashady.
Jańa stipendianttardyń 152-si – magistratýrada, 16-y doktorantýrada oqidy. Al 57 otandasymyz sheteldik ýniversitetter men ortalyqtarda kásibi taǵylymdamadan ótedi.
Budan bólek, 182 jerlesimiz álemniń jetekshi ǵylymi jáne zertteý ortalyqtarynda taǵylymdamadan ótýge grant aldy. Irikteý sapasyn arttyrý maqsatynda biyl úmitkerlerge qoiylatyn talaptar kúsheitildi. Atap aitqanda, bedeldi basylymdarda ǵylymi maqalalardyń nemese halyqaralyq patentterdiń bolýy mindetti talap retinde qarastyryldy. Sonymen qatar ǵylymi taǵylymdama baǵyttarynyń tizimi Úkimet janyndaǵy Joǵary ǵylymi-tehnikalyq komissiianyń basymdyqtaryna sáikestendirildi.
Otyrysta 2026 jyly kásibi taǵylymdamadan ótýshiler úshin «Jasandy intellekt júiesin paidalanýshylar» degen jańa sanat bekitildi. Ekonomikanyń túrli salasyn jappai tsifrlandyrý baǵdary jasandy intellekt quzyretterin damytýdy talap etedi. Bul ulttyq ekonomikanyń básekege qabilettiligin nyǵaitýdyń ári tsifrlyq transformatsiia jaǵdaiynda negizgi salalardy damytýdyń mańyzdy sharty sanalady.
Sondai-aq jiynda 2026 jyldan bastap magistratýra, doktorantýra, taǵylymdama boiynsha atom energetikasy salasyndaǵy mamandardy daiarlaýǵa baǵyttalǵan arnaiy sanatty engizý týraly sheshim qabyldandy. Jyl saiyn bul baǵytqa 20 kvota bólinedi. Mundai qadam otandyq atom ónerkásibine qajetti jergilikti bilikti kadrlardy ýaqtyly daiarlaýǵa múmkindik beredi.
Jalpy, jaratylystaný-tehnikalyq baǵyt boiynsha taǵaiyndalǵan «Bolashaq» stipendiialarynyń úlesi 2022 jylǵy 59,2 paiyzdan 2025 jyly 70 paiyzǵa deiin ósti. Injenerlik-tehnikalyq mamandyqtar boiynsha ǵylymi taǵylymdamalarǵa berilgen stipendiialar úlesi 2022 jylǵy 46 paiyzdan 72,4 paiyzǵa deiin artty.
Otyrys qorytyndysy boiynsha Memlekettik keńesshi Erlan Qarin «Bolashaq» halyqaralyq stipendiiasyn odan ári iske asyrý jáne jetildirý jóninde naqty tapsyrmalar berdi.
