«Aqjoldyq» depýtat Berik Dúisembinov Úkimetke saýal joldady.
Qazaqstan Respýblikasynyń
Premer-Ministri
B. Á. Saǵyntaevqa
DEPÝTATTYQ SAÝAL
Qurmetti Baqytjan Ábdiruly!
Halqymyzdyń qaisarlyǵy men eren erliginiń úlgisine ainalǵan Uly Jenis kúnine týra bir ai ýaqyt qaldy. Elimizdiń táýelsizdiginiń kepili, qiramas qalqany bolyp tabylatyn Qazaqstan Qarýly Kúshteriniń qurylǵanyna da mereili jiyrma bes jyl tolyp otyr. Bul shirek ǵasyr ótkenimizge oi jiberip, bolashaqty paiymdaityn ýaqyt. Elimiz qai kezde de qol bastaǵan batyrlarǵa, halqy úshin janyn qiǵan qaharmanǵa kende bolǵan emes. Búgingi depýtattyq saýal halyq qaharmandary týraly bolmaq.
Batyrǵa degen búgingi qurmet, erteń eli úshin atqa qonatyn urpaqqa ónege bolýy tiis.
«Halyq qaharmany» atanǵan batyrlarymyzdyń qazirgi qoǵamda alyp otyrǵan oryny men nasihattalýy jáne olarǵa qórsetiletin syi-qurmet kóptegen suraqtar týǵyzýda.
Batyrlarymyz janqiiar erlikti jeńildik, ia bolmasa ótemaqy alý úshin jasaǵan joq. Tipti aramyzda júrgen az ǵana qaharmandarymyzdyń ózderi bul týraly áńgime qozǵaǵandy namys sanaityny anyq. Batyrlyq pen qarapaiymdylyq qatar júretini belgili. Olardyń erligin urpaqqa pash etip, laiyqty baǵasyn berý eldigimizge syn.
Erim degen el bolmasa, elim degen er qaidan týsyn! Elbasymyzdyń eń alǵashqy Jarlyqtarymen halqymyzdyń batyr uldary, attary ańyzǵa ainalǵan Baýyrjan Momyshuly, Raqymjan Qoshqarbaevtardyń osy ataqtyń alǵashqy iegerleri atanǵany osy sózimizdiń dáleli.
Sonymen qatar, beibit kúnde erlik kórsetken birtalai azamattarymyz da osy marapatqa laiyq dep tanyldy. Alǵashqy ǵaryshkerlerimiz – Toqtar Áýbákirov pen Talǵat Musabaevtar, keshegi Aidyn Aiymbetov, aýǵan soǵysynyń batyry, qazir aramyzda otyrǵan Baqytjan Ertaev aǵalarymyz – bizdiń maqtanyshtarymyz.
Sol siiaqty 2011 jyly Tarazda, terroristerden adamdardy qutqarý jolynda erlikpen qaza tapqan Baitasov Ǵazizdy qalai ǵana qaharman demeske?
Jas urpaqqa ideal bolatyn, Otan qorǵaý, patriotizm degen qasietti uǵymdardy pash etetin dál osy qaharmandarymyz ekeni anyq. Jasyratyny joq, tizimdegi otyz batyrymyzdyń birazynyń esimin búgingi urpaq bilmeidi.
Mektep túlekteriniń test suraqtarynda birkúndik shoý-biznes ókilderiniń attarynyń ornyna, soǵysta kózsiz erlik kórsetip, beibit kúnde eń basty qundylyq-adam ómirine arasha túsip, jandaryn shúberekke túigen erlerdiń esimi nege turmasqa? Erlikke sýsyndap ósken urpaq ta namysyn qoldan bermeitin azamat bolyp óspei me?
Olar jaiynda oqýlyqtarda múldem aitylmaidy deýge bolady. «Halyq qaharmany» ataǵy tiisti áleýmettik statýsymen asa bektitilmegen.
Al, kórshi memlekette «Geroi Rossii» ataǵyna ie bolǵan qandasymyz Serik Sultanǵabievtiń erligine eń joǵarǵy memlekettik deńgeide qurmet kórsetilip jatqandyǵyn óz kózimizben kórip otyrmyz. Mysaly basqa da áleýmettik kómekterden tys, olar 75 000 myń rýbl ai saiyn járdem aqy alady. Jaraqattaryna qaramastan, erliktiń simvoly retinde ásker qatarynda qaldyrylyp, áskeri bólimge komandir bolyp taǵaiyndaldy.
Reseide ondai batyrlardyń sany 1,5 myńnan astam bolsa da, olarǵa bólinetin qarjyny eshkim biýdjetke artyq júk dep sanamaidy.
Al bizdiń beibit elde, soǵys Kaharmandarynyń sany saýsaqpen sanarlyq bolsa da, olarǵa memleket kórsetetin shyǵyndary biýdjetke qymbat túsedi dep qorqyp otyrmyz.
Zańnamada belgilengen Halyq qaharmandaryna beriletin jeńildikterdiń ishinde 20 sharshy metr qosymsha baspana men tegin qabir tasyn ǵana atap ótýge bolady. Bundai kózqaras bizdiń jaýyngerlerimizdi qandai erlik jasaýǵa itermeleidi? Otan úshin erlik jasap múgedek bolsa, onyń otbasy qaiyrymdylyqqa ǵana qarap otyra ma?
Osyǵan bailanysty, «Aq jol» QDP «Halyq qaharmany» iegerleriniń erlikterin búgingi urpaqqa keńinen nasihattaý maqsatynda kelesi sharalardy júzege asyrý kerek dep sanaimyz:
1) «Halyq qaharmany» ataǵy ielerine Úkimet qaýlysymen laiyqty mártebe berý;
2) Astana jáne Almaty qalalarynda, oblys ortalyqtarynda «Halyq qaharmandary» alleiasyn ashý jáne eldi mekenderdegi áleýmettik obektiler men kóshelerge olardyń attaryn berý;
3) Batyrlardyń ómirbaiany, erlik joldaryn jeke jinaq qylyp shyǵaryp, mektep baǵdarlamasyna engizý jáne de Erlik sabaǵyn dástúrge ainaldyrý.
«Aq jol» QDP fraktsiiasynyń depýttary
