Elimizde joǵary oqý oryndarynyń jas pedagog-túlekterin Ulttyq biliktilik testin tapsyrǵannan keiin ǵana jumysqa qabyldaý josparlanyp otyr.
Bul týraly QR Bilim jáne ǵylym ministrliginen málim etti, dep habarlaidy "Ult aqparat".
Vedomstvo málimetinshe, bul jańashyldyq kadr sapasyn arttyrýǵa baǵyttalǵan. Biliktilik testi túlekterdiń pán boiynsha bilimi men oqytý ádistemesiniń deńgeiin anyqtaýǵa múmkindik beredi.
«Mundai jańashyldyq bilikti pedagogter balalarymyzǵa sapaly bilim berýleri úshin engizilip otyr. Biyl oqýyn támamdaǵan joǵary oqý oryndarynyń túlekteri men osy ýaqytqa deiin mektepte jumys istemegen pedagogter Ulttyq biliktilik testin tapsyrýy tiis. Test tapsyryp, qajetti ball jinaǵan túlekterdi ǵana jumysqa qabyldaý josparlanyp otyr. Ulttyq biliktilik testi biliktiligin dáleldegennen keiin túlekter óz kásibi daǵdylaryn mektep qabyrǵasynda kórsete alady. Bul jańashyldyq oqýyn aiaqtap, pedagog bolyp jumys isteýge niet bildirgen tulǵalarǵa ǵana qatysty. Iaǵni, jumys istep júrgen muǵalimderge bul talaptar qoiylmaidy», – dedi QR BǴM Mektepke deiingi jáne orta bilim komitetiniń tóraiymy Maira Meldebekova.
Qazaqstandyq joǵary oqý oryndaryna jańashyldyqtyń oryndylyǵy men qajettiligi týraly túlekter arasynda aqparattyq-túsindirý jumystaryn júrgizý tapsyryldy. Ulttyq biliktilik testi bastaldy. Testti tapsyrý úshin Ulttyq testileý ortalyǵynyń saitynda aldyn ala tirkelý qajet.
Esterińizge sala keteiik, 2020 jyldan bastap joǵary oqý oryndaryna pedagogikalyq mamandyqtar boiynsha túsýge niet bildirgen túlekterge qoiylatyn talaptar kúsheitildi. Eger buryn UBT-da bolashaq pedagogter úshin shekti ball 50 bolsa, endi shekti ball 75-ke deiin kóterildi. Shákirtaqy kólemi de 26 myńnan 42 myń teńgege deiin ulǵaityldy. Osy jyldyń qyrkúiek aiynan bastap elimizdegi barlyq stýdenttiń shákirtaqysy 20%-ǵa ósetinin aita ketken jón.
