Almaty oblysy Ile aýdany Ótegen batyr kentindegi № 7 orta mektebinde «Smartsarbaz» - «Jas órt sóndirýshi» kadet synyby bar. Onda jas balǵyndar qutqarýshylyq qyzmetke, órtten qutqarý daǵdylaryna jattyǵady. Búgin atalǵan jas sarbazdar oblys ákimi Amandyq Batalovpen kezdesýge keldi.
«Jas órt sóndirýshi» synybyn Ile aýdandyq bilim bólimi men tótenshe jaǵdailar bóliminiń birlesken jobasy dep ataýǵa da bolady. Qos taraptyń ortaq sheshimimen 2019-2020 oqý jylynda ashylǵan arnaiy synypta qazir 27 oqýshy bilim alýda. Bul - respýblikada eń birinshi bolyp Almaty oblysynda qolǵa alynǵan igi bastama.
Kezdesý sapta turǵan jas sarbazdar kapitanynyń oblys ákimi A.Batalovqa raport berýimen bastaldy. Oblystyq tótenshe jaǵdailar departamentiniń bastyǵy Erlan Nurpeiisov oblys basshysyna balalar men olardyń ustazdaryn tanystyryp ótti. Al kadet synybyn oqytý men tárbieleý jumystary jóninde № 7 orta mekteptiń direktory Zahida Torehodjaeva qysqasha baiandap berdi. Onyń aitýynsha, balalar tústen keiingi ýaqytta áskeri-sporttyq oiyndarǵa, qarý ustaý, qarýdy shashyp-jinaý sheberligine mashyqtanyp, qutqarý ádis-tásilderin úirenedi. Mektep basshysy kadet synybynyń balalardy eljandylyqqa, patriottyq rýhta tárbieleýdegi yqpaly zor ekenin aitty.
Amandyq Batalov balalarmen tildesip, Taldyqorǵan jaily, aldaǵy maqsattary týraly pikirlerin surady.
Az-kem áńgimeden soń oblys ákimi:
- Respýblikada birinshi bolyp qolǵa alynǵan bul jobany basqa da mektepterge úlgi etip, tájiribesin taratýǵa bolady. Biylǵy jyldy Prezidentimiz Eriktiler jyly dep belgiledi. Kómektesý, qol ushyn sozý qoǵamqa kez kelgen ýaqytta qajet. Sondyqtan qutqarýshy mamandyǵy eń aiaýly, eń kerekti mamandyq. Osyndai synypta oqý bolashaqta mamandyq tańdaýlaryńa da óz yqpalyn tigizedi dep oilaimyn. Osy kezden úirengen qatań tártiptiń arqasynda oilaǵan arman-maqsattaryńa jetesińder. Tártip bolǵan jerde nátije de bolady. Ata-analaryńdy, úlkenderdi syilańdar, kishige qamqorlyq jasańdar, ózgelerge úlgi bolyńdar. Senderdiń kózderińdegi ushqyndy kórip qýanyp turmyn. Senderdiń jan-jaqty, bilimdi de tárbieli azamat bolyp ósýlerińe biz barlyq jaǵdaidy jasaimyz, - dep A.Batalov synypqa Smart-LED televizor syiǵa tartty.
Jalpy Ótegen batyr kentindegi № 7 mektepte 2016-2017 oqý jylynda dál osyndai joba ishki ister bólimimen birlesip qolǵa alynyp, «jas politsiia» kadet synyby ashylǵan bolatyn. Qazir ol synyptaǵy balalardyń aldy 7 synypta, jańadan qabyldanǵandary 5 synypta oqyp júr. Dál sol siiaqty «Jas órt sóndirýshi» kadet synybyna da ár jyly 5 synyp oqýshylarynyń arasynan iriktelip, qabyldanyp otyrady.
Oblystyq tótenshe jaǵdailar departamenti mamandarynyń aitýynsha, synypty «smart» ataýyn qosý balalardyń robototehnikany qatar meńgerýimen bailanysty. Jas sarbazdardy jan-jaqty etip tárbileýge nazar aýdarylyp, olardyń shyǵarmashylyq, áskeri jáne tehnikalyq baǵattaǵy mashyqtaryn damytýǵa kóńil bólingen. Mektep bitirgende bul jas órkenderge órt sóndirýdiń arnaiy kýrsyn aiaqtaǵany týraly sertifikat beriledi. Mundai Azamattyq qorǵanys salasyna beiimdeitin kadet synybyn ashýdaǵy maqsat - bolashaq qutqarýshylardy mektep qabyrǵasynan daiarlaý, balalardyń jastaiynan tártipke úirenýine yqpal etý.
Kezdesý sońynda oblys ákimi jas qutqarýshylarmen birge estelik sýretke tústi.
Munan soń balalar Oqýshylar saraiy, qalalyq tótenshe jaǵdailar basqarmasyndaǵy mýzei, oblystyq tótenshe jaǵdailar departamentiniń ǵimaratyn jáne basqa da qalanyń kórnekti oryndaryn aralady.
Almaty oblysy ákiminiń baspasóz qyzmeti
