Nursultan Nazarbaev qory «KazRoboProject» baiqaýynyń jas ónertapqyshtary protsesterdi avtomattandyrý, erekshe qajettilikteri bar adamdardyń ómirin jeńildetý, bos ýaqytty uiymdastyrýǵa arnalǵan kreativti ideialaryn usyndy, dep habarlaidy "Ult aqparat".
Jyl boiy jobanyń 10 jastan 21 jasqa deiingi qatysýshylary arasynan úzdikterdi irikteý júrgizildi. Baiqaý «KazRobotiks» federatsiiasynyń damý baǵdarlamasynyń bir bóligi jáne jastardyń shyǵarmashylyq qabiletterin damytýǵa, ǵylymi-tehnikalyq baǵyttaǵy qoldanbaly zertteýlerge qyzyǵýshylyǵyn arttyrýǵa baǵyttalǵan.
- Jastar jobasyn naqty jaǵdailarda múmkin bolatyn praktikalyq qoldanýǵa maqsatty túrde daiyndaý sharalary jas ónertapqyshtardy ratsionalizatorlyq qyzmettiń negizderin túsinýge jeteleidi, olardyń ári qarai kásibi ósýine negiz qalaidy, - deidi «KazRobotiks» federatsiiasynyń prezidenti Aijan Jekeeva.
Balalar jasaǵan jobalar – bul belgili bir máseleni sheshý úshin aitarlyqtai paida ákeletin tehnikalyq qurylǵyny (robotty qurylǵy, mikroprotsessorlyq júie) qurýǵa baǵyttalǵan qoldanbaly jumystar.
Baiqaý eki jas tobynda ótti: 10-15 jas jáne 16-21 jas, sondai-aq ár jas tobynda eki nominatsiia boiynsha: «Kontsept» jáne «Prototip» jeńimpazdar anyqtaldy.
Baiqaýǵa elimizdiń ár túkpirinen barlyǵy 62 joba usynyldy. Jumystardy Qazaqstan mashina jasaýshylar odaǵynyń ókilderi, óndiris injenerleri, ótken jyldardyń júldegerleri jáne t. b. baǵalady.
Baiqaý jeńimpazdary:
- 10-15 jas aralyǵyndaǵy topta «Kontsept» nominatsiiasy boiynsha – «Twinkle» (Kókshetaý qalasy) komandasynyń músheleri Dáýrenbek Sáken jáne Bolat Aidamir . Balalar zamanaýi «IT-oiyn-saýyq parki» tujyrymdamasyn ázirledi.
Ekinshi jeńimpaz – quramynda Andrei Dorohin men Aipara Syzdyqova bar «Grad» komandasy (Pavlodar qalasy). Olar «Firebot» dep atalatyn adamnyń qatysýynsyz órt sóndirý mashinasyn jasaý jobasyn usyndy;
- 16-21 jas aralyǵyndaǵy topta «Kontsept» nominatsiiasy boiynsha – Farabi Samalikov pen Muhtar Orazbai (Atyraý qalasy, «FM Team» komandasy). Olar erekshe qajettilikteri bar adamdardyń aiaq-qolyn ońaltýǵa arnalǵan belsendi-passivti trenajerdy oilap tapty;
– 10-15 jas aralyǵyndaǵy topta «Prototip» nominatsiiasynda – Ádilet Shalqaruly jáne Dariia Seksenbaeva (Taldyqorǵan q., «Future-IT»). Baiqaýǵa qatysýshylar «erekshe qajettilikteri bar adamdarǵa arnalǵan bilezik» jasady. Bilezik adamdarǵa qajetti avtobýs baǵytyn, avtobýs jelisin tabýǵa, qandai da bir kederginiń qanshalyqty jaqyn ekenin anyqtaýǵa kómektesetin eholokator retinde ázirlengen;
- 16-21 jas aralyǵyndaǵy topta «Prototip» nominatsiiasy boiynsha – Daniil Belov pen Anastasiia Voronkova («Robotrek-Aqtaý»). Olar «Brail shriftin óz betinshe oqyp úirený» jobasynyń avtorlary. Qurylǵy nashar kóretin jáne zaǵip adamdarǵa jazýdy jáne oqýdy úirenýge kómektesedi. Qurylǵy batyrmasyn basý arqyly adam árip dybysyn estip qana qoimai, saýsaqtyń kómegimen onyń qalai belgilenetinin sezinýge bolady.
Baiqaý jeńimpazy atanǵan bul jobalardan bólek, finalǵa shyqqan jobalar da ónertapqyshtyǵymen erekshelendi. Mysaly Matvei Rybalkin men Daniil Edgýlovtyń (Almaty qalasy) «City helper» qurylǵysy. Ol kózi nashar kóretin adamdarǵa qajetti aialdamany tabýǵa, avtobýs tańdaýǵa kómektesetin kommýtator saǵat.
Taǵy bir qyzyqty joba – finalist Arlan Muhamedjanov pen Vladislav Prosekovtyń (Petropavl qalasy) «Aeroponika» jobasy. Olar ósimdikterdi sýdy únemdi paidalaný arqyly sýǵarýǵa, robototehnika arqyly egin jinaýǵa jáne barlyq protsesterdi qashyqtan baqylaýǵa múmkindik beretin júieni oilap tapty.
