Kegen aýdanyndaǵy tabiǵaty kórkem de kelisti Saty aýyldyq okrýgi aýmaǵynda, kórikti Kólsaida «Jetisý kóktemi» atty jas tilshiler men ádebietshilerdiń II oblystyq forýmy ótti.
Ras, jer jannaty Jetisý ólkesi bolsa, onyń móldirep qana jatatyn marjany - Kólsai kólderi. Onyń aty men ataǵy, tabiǵat áleminiń tamashasy alys-jaqyn shetelderge de tanys. Ásirese, jaz maýsymynda bul mań týristerden, qonaqtardan arylmaidy.
Oblystyq jas tilshiler men ádebietshilerdiń forýmyn dál osy óńirde ótkizýdiń jóni de, joly bólek. Ósip kele jatqan daryndy, talantty jastarǵa týǵan ólkemizdiń jaqsy jerin kórsetý arqyly shyǵarmashylyqtaryna yqpal etip, osyndai kórkem jerlerimizben qýana, maqtana alatynymyzdy dáleldeý - forýmnyń negizgi maqsaty boldy.
Kórikti óńirde Úkimetimizdiń qaýlysymen qurylǵanyna 10 jyldan asyp ketken «Kólsai kólderi» Ulttyq tabiǵi parki memlekettik mekemesi jumys isteidi. Forýmǵa qatysýshylar alǵashqy kúni Saty aýylynyń ortalyǵyndaǵy park ǵimaratynda sektsiialyq otyrystarǵa qatysty. Onyń jumysyn Qazaqstan Jazýshylar Odaǵy oblystyq filialynyń direktory E.Júnis pen «Egemen Qazaqstan» gazetiniń oblystaǵy menshikti tilshisi Q.Muqametqali júrgizdi.
Eki bólmede ótkizilgen sektsiialyq jumystarǵa oblystyq tilderdi damytý jónindegi basqarma basshysy Aidar Bashbaev qatysyp, forýmnyń negizgi maqsaty týraly áńgimeledi. Forýmǵa qatysýshy jas tilshiler men qalamgerler óz oilaryn ortaǵa salyp, jas aqyndar óleńderin oqydy. Osynaý igi sharadan keiin kórikti Kólsaidyń tabiǵatyn tamashalady. Sońǵy úsh jyldan beri Jalańash aýylynan Kólsaidyń ózine deiingi jol jasalǵandyǵy kópshilikti qýantty. Tipti, Saty aýylynan Kólsaiǵa deiingi jol asfalttalyp tastalǵan. Esh qiyndyqsyz shamaly ýaqytta Kólsaida bolasyń. Munyń ózi kóńildi marqaita túsedi. Forýmǵa qatysýshylar móp-móldir kóldiń jaǵasynda estelik sýretke tústi.
Forýmnyń jumysy senbi kúni Saty aýylyndaǵy Mádeniet úiinde saltanatty túrde ashyldy. Forýmǵa arnalǵan negizgi baiandamany oblystyq tilderdi damytý jónindegi basqarma basshysy Aidar Bashbaev jasady. Qazaq tilin birte-birte latyn álipbiine aýystyrý maqsatyna arnalǵan is-sharalar sońǵy jyldardan beri jalǵasyn taýyp keledi. Oblystyń barlyq aýdandaryndaǵy jurtshylyqpen jinalys ótkizip, latyn áripine kóshýdiń mańyzy jan-jaqty aityldy. Buǵan Tuńǵysh Prezidentimiz N.Nazarbaevtyń «Bolashaqqa baǵdar: rýhani jańǵyrý» atty maqalasy birden-bir yqpalyn tigizip otyr. Oblys turǵyndarynyń 60 paiyzdan astamy latyn álipbiine kóshýdi qoldap otyr. Oblystyq basqarma arqyly «Latyn álipbiine kóshý – zaman talaby» atty 19 beinerolik jasalyp, turaqty kórsetilýde. Respýblikalyq, oblystyq jáne jergilikti basylymdarda eki myńnan asa maqalalar jaryq kórgen. Oblysta, birqatar aýdandarda tildi oqytý ortalyqtary jumys isteidi. Endi qalǵan 10 aýdanda osyndai ortalyqtar ashylyp, jumysyn júrgizetin bolady. Basqarma arqyly 30 formatty animatsiialanǵan kitaptar shyǵarylǵan. «Jańa álipbidi jazyp úireneiik» atty onlain-sabaq júrgiziledi.
Basqarma basshysy A.Qarbozuly «Jetisý kóktemi» atty jas tilshiler men qalamgerlerdiń forýmy byltyrdan bastaý alǵanyn sóz etip, biylǵy basqosýdy ádeii osynaý kórikti óńirde ótkizýdi uiǵarǵanyn sóz etti. Bul jas talanttardyń shyǵarmashylyǵyna oń áserin tigizetin bolady. Oblystyq basqarma arqyly «Jastar jyrlaidy» atty baiqaýdyń bastalatynyn alǵa tartyp, oǵan jastardy belsene qatysýǵa shaqyrdy.
Jastar forýmynda Kegen aýdanynyń ákimi Talǵat Baiedilov sóz alyp, osynaý oblystyq úlken forýmdy kórikti Kólsai aýmaǵynda ótkizgenderi úshin alǵysyn aityp, jas talant ielerine shyǵarmashylyq tabys tiledi. Forýmda oblystyq «Til» oqý-ádistemelik ortalyǵynyń oqytýshysy J.Elesbaeva «Álipbi aýystyrý – qazaq jazýyna reforma jasaýdyń alǵy sharty» atty taqyrypta keńinen sóz qozǵady. Qazaqstan Jazýshylar Odaǵy oblystyq filialynyń direktory E.Júnis, «Egemen Qazaqstan» gazetiniń oblystaǵy menshikti tilshisi Q.Muqametqali, Uiǵyr aýdandyq «Qaradala tynysy» gazetiniń tilshisi S.Anvarova, Ile aýdany Qaraoi aýylyndaǵy №18 orta mekteptiń psihologi V.Taliýs sóz alyp, óz oilaryn ortaǵa saldy.
Kegen aýylynyń bir túlegi, talantty jas aqyn Áliia Ińkárbek júrekjardy sózin jetkizip, Kegen aýylyna arnaǵan óleńin oqydy. Kerbulaq aýdanyndaǵy D.Qonaev atyndaǵy orta mekteptiń bastaýysh synyp muǵalimi Kámshat Shynarbaeva birinshi synyptarǵa arnap latyn álipbiin úiretýdiń kitapshasyn shyǵarǵanyn aityp, aldaǵy ýaqytta igilikti isin jalǵastyryp, bastaýysh synyptarǵa arnalǵan kitapsha shyǵarmaq oiy baryn jetkizdi.
Oblystyq «Jetisý» telearnasy «Oqyrman» baǵdarlamasynyń sarapshysy Qozybai Qurman men oblystyq «Jetisý» gazetiniń tilshisi Muhtar Kúmisbek jyrdan shashý shashty. Osylaisha, memleketimizdiń latyn álipbiine kóshýge arnalǵan nysanaly jumysy, irgeli maqsatyna negizdelgen jastar forýmy óz jumysyn sátimen aiaqtady.
Jastar forýmyna qatysýshy jas talant ieleri, qalamgerler osyndai basqosýǵa negiz qalaǵan oblystyq tilderdi damytý jónindegi basqarmanyń atyna, Kegen aýdanynyń ákimdigine, tiisti bólimniń qyzmetkerlerine júrekjardy alǵystaryn aitty.
Qanat BIRJANSAL
