Bes ai boiy qatań karantinde otyrsa da, Argentinadaǵy koronavirýs jaǵdaiy nasharlai tústi, dep habarlaidy Bloomberg agenttigi.
Koronavirýsqa test tapsyrǵan el turǵyndarynyń shamamen 47% oń nátije kórsetti.
Argentina Chilidi basyp ozyp, infektsiia juqtyrǵandar sany boiynsha álemde 10-orynda tur. Elde koronavirýs infektsiiasynyń 417 735 jaǵdaiy tirkelip, virýstyń saldarynan 8 730 adam qaitys boldy.
Tek sońǵy aptada rastalǵan jaǵdailardyń sany infektsiia jaǵdailarynyń sany boiynsha alǵashqy jiyrmalyqqa kiretin elderge qaraǵanda 9,9%-ǵa ósken. Mysaly, Úndistanda ósim 9%-ǵa jetken.
Bastapqyda virýs Býenos-Aires pen oǵan jaqyn aýdandarda tirkelgen edi. Alaida jaqynda buryn juqtyrý jaǵdailary tirkelmegen nemese óte az bolǵan shaǵyn, kedei provintsiialarǵa tarady.
Keibir aýdandarda, mysaly, Boliviiamen shekaralas jatqan Jýjýi provintsiiasynda koronavirýs pen ony juqtyrý jaǵdailarynyń órshýine bailanysty densaýlyq saqtaý júiesi bar kúshin salyp jumys isteýde.
Jaqynda Argentina prezidenti Alberto Fernandes karantindi 20 qyrkúiekke deiin uzartty, iaǵni karantin elde alty aiǵa sozylyp otyr. Bul óz kezeginde Argentina ekonomikasyna teris áser etedi. Jumyssyzdyq deńgeiiniń ózi 10%-dan asty.
Aita ketý kerek, álem halqynyń 8%-yn quraityn Latyn Amerikasy men Karib teńizi aimaǵyndaǵy elderde ólim men koronavirýs infektsiiasynyń jalpy sanynyń 30%-y tirkelgen. Óńirde COVID-19 juqtyrýdyń 19 million jaǵdaiy tirkelip, virýstan 276 myń adam qaitys bolǵan.
Búgingi tańda Braziliia koronavirýs infektsiiasyn juqtyrý jáne ólim sany boiynsha kóshbasshy bolyp qala beredi – munda 4 millionǵa jýyq juqtyrý jaǵdaiy tirkelip, 121 myńnan astam adam qaitys bolǵan.
