Ekologiia ministrliginiń arnaiy komissiiasy Jarkentke attanyp ketti, dep habarlaidy ministrliktiń baspasóz qyzmeti.
Baspasóz qyzmetiniń málimetterine qaraǵanda, jergilikti turǵyndar zaýyttyń tazartý qondyrǵylarynan aýaǵa taraityn jaǵymsyz iiske birneshe ret shaǵymdanǵan.
«Biz qoqys jinalatyn súzý alańdaryn aralaǵan kezde, onda lastaýshy zattardyń jinalyp qalǵanyn baiqadyq. Odan keiin jergilikti qoǵamdastyq ókilderimen kezdesip, zaýytty araladyq. Bar másele onyń qalalyq, kommýnaldyq tazartý qyzmetine senip, jeke qoqys tazartý qurylǵysynsyz jobalanǵanynda bolyp otyr. Al 2018 jyly qalalyq kollektor lastaýshy zattardyń kóptiginen, bul isten bas tartqan. Kollektor mundai kólemge qyzmet kórsete almaityn edi. Sondyqtan kompaniia kollektoryn salǵanymen, qaldyqty tazartpai, tikelei, súzý alańyna qubyr arqyly jiberip otyrǵan», - deidi QR EGTRM Ekologiialyq retteý jáne baqylaý komitetiniń tóraǵasy Zulfyhar Joldasov.
Nátijesinde júgeri óńdeýden qalǵan qaldyqtyń kóp bóligi súzý alańyna jinalyp, byjyp, búlingen iis shyǵara bastaǵan. Sóitip, kúkirtsýtek shyǵaryndysy paida bolyp, jergilikti turǵyndar budan zardap shegýde.
Ekologiia ministrligi júrgizgen tekserý barysynda kásiporynnyń tiisti ekologiialyq saraptamasyz jumys istegeni belgili boldy. Sol úshin oǵan kásiporynǵa aiyppul salyndy.
Sonymen qatar, Ekologiia ministrligi kásiporyndy jaqyn arada tolyqtai tekserip shyǵý týraly sheshim qabyldap otyr. Shyǵaryndy deńgeiiniń shamadan asýy rastalsa, onda shyǵaryndy tógýge tyiym salýdan bastap, káiporyndy jabýǵa deiin másele qoiylady.
Budan basqa, ministrlik kásiporyn shyǵaryndysy tógilgen súzý alańyn qalpyna keltirýdi talap etýde.
Al kompaniia tazartý qurylystarynyń salynyp jatqanyn aityp, ony tamyz aiynda iske qosý josparlanyp otyrǵanyn habarlady. Kásiporyn óndiristi óz erkimen ázirge toqtata turady.
Óz kezeginde, Ekologiia ministrligi kásiporynǵa jergilikti ákimdikpen birlesip, tazartý nysandarynyń qurylysyn júrgizip, aiaqtaý, odan ári mindetti túrde súzilgen shyǵaryndyny ǵana tastaý, súzý alańyn qalpyna keltirý jónindegi jol kartasyn ázirleý týraly usynys aitty. Qabyldanǵan sharalar týraly keiin tolyǵyraq habarlanady.
