Almaty oblysynyń Jarkent qalasynda oiyn klýbynyń aqshasyn tonap ketkender ustaldy, dep habarlaidy QazAqparat.
Almaty oblysynyń politseileri oiyn klýbynan million teńgeden astam qarajat urlaǵan qarýly qaraqshylardy jedel túrde anyqtap, ustady.
«Aǵymdaǵy jyldyń 15 qarashasynda saǵat 04:00 shamasynda Panfilov aýdany PB-niń kezekshi bólimine Jarkent qalasyndaǵy oiyn klýbyna qarýly qaraqshylyq shabýyl jasalǵany týraly habarlama kelip tústi. Qaraqshylar bir millionnan astam teńgeni iemdenip ketken. Aryzdanýshylar qylmyskerlerdiń tapanshamen qarýlanǵanyn jáne qorqytý maqsatynda joǵaryǵa qarata bir ret oq atqandaryn jetkizgen.Atalǵan fakt QR QK-niń 192-babynyń 2-bóligi 1, 4-tarmaqtary boiynsha SDTBT-de tirkeldi.
Oqiǵa ornyna jetken jedel-tergeý toby aqparatty rastady.Tekserý barysynda qylmys ornynan diametri 9 mm bolatyn atys gilzasy tabyldy. Keshendi jedel-izdestirý is-sharalarynyń nátijesinde Jarkent qalasynyń turǵyndary bolyp tabylatyn úsh kúdiktini Almaty qalasynyń ártúrli jerlerinen (qonaq úiden, jaldamaly páterden jáne kósheden) anyqtap, ustady», - delingen Almaty oblystyq Politsiia departamenti baspasóz qyzmetiniń habarlamasynda.
Vedomstvonyń aqparatyna sáikes, ustaý kezinde 20 jastaǵy kúdiktiden urlanǵan aqshanyń jartysy men tapansha tárkilendi. Somanyń taǵy bir bóligi 22 jastaǵy ekinshi kúdiktiden jáne olardyń 23 jastaǵy seriktesinen alyndy.
«Barlyq ustalǵan azamattar dáleldermen áshkerelenip, qalǵan aqshany oiyn-saýyqqa jumsaǵanyn jetkizip, qylmys jasaǵandaryn moiyndady.Qaskúnemderdiń áreketteri beinekameralarǵa túsip qalǵan. Barlyq úsh figýrant QR QIJK 128-babyna sáikes bultartpaý sharasyn tańdaý týraly másele sheshilgenge deiin ÝUO-ǵa qamaqqa alyndy.QR QIJK 201-babyna sáikes ózge aqparat jariia etilmeidi», - dedi Almaty oblysy PD TB bastyǵynyń orynbasary politsiia polkovnigi Samal Arǵynǵazynova.
