Qazaqstandyqtarǵa múgedektik jáne asyraýshysynan aiyrylý boiynsha járdemaqy túrinde 130 mlrd teńgeden astam qarajat tólendi. Bul týraly Eńbek jáne halyqty áleýmettik qorǵaý ministrligi habarlady.
2021 jylǵy qańtar-sáýir ailary aralyǵynda respýblikalyq biýdjetten múgedektigi boiynsha memlekettik áleýmettik járdemaqy tóleýge 102,8 mlrd teńge, asyraýshysynan aiyrylý jaǵdaiyna 27,4 mlrd teńge baǵyttaldy.
2021 jylǵy 1 mamyrdaǵy jaǵdai boiynsha múgedektigi boiynsha memlekettik áleýmettik járdemaqy alýshylardyń sany 525,1 myń adamdy, asyraýshysynan aiyrylý jaǵdaiy boiynsha 169,6 myń adamdy quraidy.
Múgedektigi boiynsha memlekettik áleýmettik járdemaqylardyń mólsheri múgedektiktiń tobyna jáne sebebine, sondai-aq tiisti qarjy jylyna arnalǵan «Respýblikalyq biýdjet týraly» zańda belgilenetin eń tómen kúnkóris deńgeiiniń shamasyna bailanysty bolady.
Asyraýshysynan aiyrylý jaǵdaiy boiynsha memlekettik áleýmettik járdemaqylardyń mólsheri qaitys bolǵan (qaza tapqan) asyraýshysynyń asyraýyndaǵy adamdardyń sanyna, sondai-aq tiisti qarjy jylyna arnalǵan «Respýblikalyq biýdjet týraly» zańda belgilenetin eń tómen kúnkóris deńgeiiniń shamasyna bailanysty bolady.
2021 jylǵy 1 mamyrdaǵy jaǵdai boiynsha múgedektigi boiynsha memlekettik áleýmettik járdemaqynyń ortasha mólsheri 49 150 teńgeni, asyraýshydan aiyrylý jaǵdaiy boiynsha memlekettik áleýmettik járdemaqynyń ortasha mólsheri 40 653 teńgeni qurady.
