Bas memlekettik sanitarlyq dárigerdiń sońǵy qaýlysy boiynsha 20 adamnan asatyn ujymdardyń barlyǵy 15 shildege deiin vaktsina saldyrýǵa mindetti. Sputnik Qazaqstan tilshisine suhbat bergen densaýlyq saqtaý ministrliginiń resmi ókili Erjan Baitanaev belgilengen ýaqytqa deiin ekpe almaǵan jumysshylar men jumys berýshiler qandai jazaǵa tartylatynyn aityp berdi.
Onyń aitýynsha, shaǵyn, orta jáne iri kásiporyndardyń jumysshylary jazaǵa tartylmaidy, olarǵa aiyppul salynbaidy. Al vaktsina saldyrmaǵan adamdardy jumysqa kirgizgen kásipkerlerge qatysty Ákimshilik quqyqbuzýshylyq týraly kodekstiń 462-baby, 3-bóligi boiynsha ákimshilik hattama rásimdeledi.
"Memlekettik baqylaý jáne qadaǵalaý organdary (laýazymdy adamdar), memlekettik organdardyń laýazymdy adamdary ózderiniń quzyreti sheginde bergen zańdy talaptardy, nusqamalardy, usynýlardy, qaýlylardy oryndamaý nemese tiisti deńgeide oryndamaýy úshin aiyppul tóleidi", - delingen osy bapta. Aiyppuldyń kólemi de kórsetilgen. Olar:
jeke tulǵalarǵa – 5 AEK (14 585 teńge shamasynda),
laýazymdy adamdarǵa – 15 AEK (43 755 teńge shamasynda),
shaǵyn kásipkerlik sýbektilerine nemese kommertsiialyq emes uiymdarǵa – 100 AEK (291 700 teńge shamasynda),
orta kásipkerlik sýbektilerine – 200 AEK (583 400 teńge shamasynda),
iri kásipkerlik sýbektilerine – 500 AEK (1 458 500 tenge).
Budan bólek, kásipkerlik nysannyń qyzmetin toqtatýy da múmkin.
Osy oraida qoǵam ishinde "IP" ashqan jáne jalǵyz ózi isteitin kásipkerlerge qatysty suraqtar jii qoiylyp jatyr. Máselen, shashtaraz jeke kásipker retinde tirkelip, ózi ǵana jumys isteidi.
"Ondai jeke kásipkerge mikro-IP retinde jeke adamdarǵa qarastyrylǵan aiyppul (5 AEK) salýǵa sheshim qabyldandy", - deidi Baitanaev.
Tekseris qashan bastalady?
Densaýlyq saqtaý ministrliginiń málimetine sáikes, tekseris sharalary 15 shildede bastalady. Biraq ol kezde ishinara tekseris bolady, jumysshylardyń birinshi komponentti qabyldaý jaǵy tekseriledi.
"Al 15 tamyzdan keiin jappai tekserister bastalady. Sonda jumysshylarǵa vaktsinanyń tolyq eki komponenti egildi me, joq pa, osyny tekseredi. Monitoringtik toptar da osy jumysqa tartylady", - dep atap kórsetti Baitanaev.
Onyń aitýynsha, qazirgi kezde Qazaqstanda vaktsinanyń kólemi jetkilikti. Aimaqtarda 2 million ekpe bar. Qazvac-tyń 100 myń dozasy men Qaraǵandy zaýytynda shyǵarylǵan "Spýtnik V"-diń taǵy 1,5 million dozasy jetkiziledi.
Sondai-aq, qytailyq Sinovac vaktsinasyn satyp alý boiynsha kelissózder júrgizilip jatyr.
