Almatyda bolǵan jappai ereýil kezinde alańǵa shyqqandardyń qoldaryna metall armatýra ustatqan 6 almatylyq turǵyn ustaldy. Bul týraly QR IIM ákimshilik politsiia komiteti basqarma basshysynyń orynbasary Dáýren Qozybaqov málim etti, dep habarlaidy QazAqparat.
«Quqyqtyq tártip» jedel-profilaktikalyq sharasy barysynda 2 myńnan astam buryn jasalǵan aýyr jáne asa aýyr qylmys ashyldy. Sonymen qatar izdeýde júrgen 327 qylmysker ustaldy. Mysaly, Almaty qalasynda jappai tártipsizdikterge qatysqan Almaty qalasy men Almaty oblysynyń 6 turǵyny ustaldy. Olar quqyq qorǵaý organdary jáne áskeri qyzmetshilerge qarsy shyǵý úshin ereýilge qatysýshylarǵa metall armatýr taratqan», - dedi Dáýren Qozybaqov onlain ótken brifingte.
Odan bólek, IIM ókili jedel-profilaktikalyq shara aiasynda kámelet jasyna tolmaǵan balaǵa shabýyl jasaǵan kúdiktiniń ustalǵanyn aitty.
«2017 jyly Shymkent qalasynda kóshede atys qarýyn qoldana otyryp, kámeletke tolmaǵan balany óltirýge qatysýshy retinde halyqaralyq izdeýde júrgen kúdikti araǵa birneshe jyl salyp Tarazdan ustaldy», - deidi ol.
