Japoniianyń Tiýbý óńirindegi Qazaqstannyń Qurmetti konsýly bolyp «Toyota Tsusho Corporation» kompaniiasynyń vitse-prezidenti Hideki Ianase taǵaiyndaldy. Bul týraly QR Syrtqy ister ministrliginen málim etti, dep habarlaidy "Ult aqparat".
Búgin Qazaqstannyń Japoniiadaǵy Elshisi Erlan Baýdarbek-Qojataev Hideki Ianasege konsýldyq patentti tabys etti.
Is-shara barysynda qol qoiylǵan kelisimge sáikes, Qurmetti konsýldyq ekijaqty iskerlik qatynastardy nyǵaitýǵa jáne mádeni-gýmanitarlyq bailanystardy damytýǵa basa nazar aýdarady.
«Toyota Tsusho Corporation» bas keńsesi eldiń ozyq indýstriialyq haby jáne óndiristik bazasy sanalatyn Tiýbý óńiriniń ákimshilik ortalyǵy – Nagoia qalasynda ornalasqan. Avtomobil jasaý, mashina jasaý, metall óńdeý jáne elektrotehnika siiaqty kóptegen salalarǵa negizdelgen aimaqtyń ekonomikasy Japoniia JIÓ-niń shamamen 20% quraidy.
«Rásim barysynda Elshi qol qoiylǵan kelisimge sáikes Qazaqstan men Japoniia arasyndaǵy investitsiialyq yntymaqtastyqty jandandyrý boiynsha birqatar naqty is-sharalar aiqyndalǵanyn aityp, H. Ianaseniń iskerlik qasietteri men jumys tájiribesi QR Qurmetti konsýly qyzmetin laiyqty atqarýǵa múmkindik beretinin atap ótti.
Óz kezeginde Qurmetti konsýl óńirdiń áleýetin eskere otyryp, Japoniia men Qazaqstan arasyndaǵy investitsiialyq jáne tehnologiialyq yntymaqtastyqty damytýǵa kúsh-jigerin salatynyn rastady», - delingen SIM aqparatynda.
Qazirgi ýaqytta Japoniianyń Kiýsiý, Kansai jáne Tiýbý aimaqtarynda elimizdiń úsh Qurmetti konsýldyǵy jumys isteidi.
Koronavirýs indetiniń áserine qaramastan, aǵymdaǵy jylǵy qańtar-maýsym aralyǵynda QR men Japoniia arasyndaǵy ekijaqty taýar ainalymy 805 mln. AQSh dollaryn qurap, 2019 jylǵy deńgeide boldy. Al qazaqstandyq eksport 550 mln. AQSh dollaryna jetip, ótken jyldyń sáikes kezeńimen salystyrǵanda 16%-ǵa ósti.
«Toyota Tsusho Corporation» - avtomobil jáne mashina jasaý, sondai-aq metall, energoresýrs, himiia jáne elektronika ónimderimen saýda jasaityn jahandyq kompaniia.
