Japoniianyń Densaýlyq saqtaý ministrligi jeksenbi kúni Iokogamada karantinde turǵan krýiz kemesinde taǵy alty adam koronavirýs juqtyrǵanyn málimdedi. Osylaisha borttaǵy indetti juqtyrǵandardyń jalpy sany 70-ke jetti. Bul týraly Kyodo agenttigi habarlady.
Densaýlyq saqtaý, eńbek jáne áleýmettik qamsyzdandyrý ministrliginiń málimetine sáikes, 20-dan 70 jasqa deiingi bes ekipaj múshesi men bir jolaýshynyń – tórt filippindik, amerikalyq pen ýkraindyqtan ótkir indet belgileri baiqalmaidy.
Ministrlik kemedegi 3700 jolaýshy men ekipaj músheleri ishindegi indet juqtyrýy múmkin 336 adamnyń analiz tapsyrǵanyn málim etti. Zertteý nátijesi taǵy 6 jolaýshynyń koronavirýs juqtyrǵanyn anyqtady.
50 elden jolaýshylary bar keme dúisenbiden beri karantinde tur. Oǵan jolaýshylardyń biriniń Gonkongta jaǵalaýǵa shyǵyp, pnevmoniiany týdyratyn koronavirýs juqtyrǵany sebep boldy.
Japoniiada jańa virýsty juqtyrǵandardyń jalpy sany 96 adamdy quraidy. Onyń 10-y Ýhan qalasynan charterlik reisterden evakýatsiialanǵan. Taǵy 16-sy – týrister men týristik avtobýstyń júrgizýshisi.
60 jastaǵy Japoniia azamaty senbi kúni Ýhan qalasynda kóz jumdy. Oǵan koronavirýs sebep bolýy múmkin. Eger kúdik rastalsa Japoniiada virýstan bolǵan alǵashqy ólim tirkelmek.
Jeksenbi kúni Gonkong portyndaǵy birneshe kúndik karantinnen keiin 3600 jolaýshy men ekipaj múshelerine World Dream krýizdik kemesinen ketýge ruqsat berildi.
Eske salsaq, buǵan deiin Japoniiadaǵy krýiz lainerindegi 41 adamnan koronavirýs anyqtalǵan bolatyn.
