Japoniiada «Hagibis» taifýny saldarynan qaza tapqandar sany 74 adamǵa jetti. Taǵy 11 adam habar-osharsyz joǵalǵan, dep habarlaidy NHK telearnasy.
Telearnanyń habarlaýynsha, 200-den astam adam jaraqat alǵan. Apat qurbandary men zardap shekkenderdiń kópshiligi Honsiý aralynyń soltústik-shyǵysyndaǵy Fýkýsima jáne Miiagi prefektýralarynyń turǵyndary. Sondai-aq Kanagava prefektýrasy da adam shyǵynyn az kórgen joq.
Qazir 13 myń páter jaryqsyz otyr, 130 myń úide sý joq.
Japoniia ministrler kabinetiniń bas hatshysy Iosihide Sýganyń málimdeýinshe, apattan zardap shekken óńirlerde infraqurylymdy qalpyna keltirý jáne izdestirý-qutqarý operatsiialary júrip jatyr. Oǵan 110 myń adam jumyldyrylǵan.
230 mektep, ondaǵan sýpermarket jabylǵan, 120-dan astam bankomat isten shyqqan.
«Hagibis» taifýny kúnshyǵys eline ótken demalys kúnderi jetken edi. Kei óńirlerde eki kún ishinde jaýyn-shashynnyń eki ailyq mólsheri jaýǵan.
