Japoniiadaǵy Qazaqstan elshiligi «Diamond Princess» lainerindegi Qazaqstan azamattarymen tyǵyz bailanysta, dep habarlaidy "Ult aqparat" QR SIM baspasóz qyzmetine silteme jasap.
«Otandastarymyzdyń jaǵdaiy jaqsy, alańdaýdyń qajeti joq, óitkeni olar koronavirýs juqtyrǵan joq. Degenmen olar virýstyń bar-joǵyn anyqtaityn tekseristen ótip, taldaý jasatty», dep málim etti SIM resmi ókili Aibek Smadiiarov.
Aita keterligi, keme 5 aqpannan beri karantinde tur. Karantin 19 aqpanda aiaqtalýy tiis. Ol aiaqtalǵan soń, azamattarymyzda koronavirýs belgileri bolmasa kemeden shyǵarylady. Japoniia lainerden bosatylǵan jolaýshylardy jerge túskennen keiin taǵy bir márte tekserýdi josparlap otyr.
Diplomattardyń málimeti boiynsha, keme bortynda qazaqstandyq eki áiel men 8 jáne 12 jasar eki bala bar. Olardyń jaǵdaiy jaqsy, shaǵymdary joq. Jolaýshylar tamaqpen jáne meditsinalyq qorǵaný quraldarymen qamtamasyz etilgen.
«Azamattar kemeden bosatylǵannan keiin virýs tabylmasa, Qazaqstanǵa oralady», - dedi Aibek Smadiiarov.
Eske sala ketsek , buǵan deiin QR Infektsiialyq aýrýlardyń jetekshi mamany Dinagúl Baesheva Diamond Princess lainerindegi qazaqstandyqtardyń densaýlyǵy týraly aityp bergen edi.
