Tokioda jazǵy Olimpiada oiyndaryna bailanysty adamdar arasynda koronavirýs infektsiiasyn juqtyrýdyń keminde 15 jańa jaǵdaiy tirkeldi. Bul týraly senbide Olimpiadanyń uiymdastyrý komiteti málim etti, dep habarlaidy TASS agenttigi.
Onyń arasynda Olimpiada nysandarynda jumys istep júrgen jeti qyzmetker, eki jýrnalist jáne jarysty uiymdastyrýshy alty adam bar.
Sońǵylardyń biri – Tokiodaǵy olimpiada qalashyǵy aýmaǵynda virýsty alǵashqy juqtyrǵan adam. Ol sheteldik quramanyń múshesi bolǵany belgili, biraq sportshy emes.
Qazirgi ýaqytta Japoniiaǵa kelgen sportshylardan jáne birneshe elden kelgen komanda múshelerinen koronavirýs anyqtaldy.
Ol Izrail, Ýganda jáne Serbiianyń atletterinen, sondai-aq Nigeriia men Resei quramalarynyń qosalqy qyzmetkerlerinen tabyldy.
Tokio Olimpiadasy 2020 jyldyń 24 shildesi men 9 tamyzy aralyǵynda ótýi tiis bolǵan.
Pandemiiaǵa bailanysty jarystar bir jylǵa keiinge qaldy, endi ol 23 shildeden 8 tamyzǵa deiin ótedi.
Uiymdastyrýshylar oiyndardy sheteldik jankúierlersiz ótkizýge sheshim qabyldady, sonymen qatar jergilikti kórermender Tokiony qosa alǵanda, alty japon prefektýrasynda olimpiada sharalaryna jiberilmeidi.
Jarys bastalardan alty kún buryn Tokioda jańa koronavirýstyń taralýyna bailanysty jaǵdai qiyndady: Japoniia astanasynda anyqtalǵan jańa jaǵdailardyń táýliktik ósimi myńnan asady.
12 shildeden bastap Tokioda epidemiialyq ahýaldyń nasharlaýyna bailanysty tótenshe jaǵdai rejimi qaitadan kúshine enip, 22 tamyzǵa deiin jalǵasady.
