Qazaqstan Premer-Ministriniń orynbasary - Syrtqy ister ministri Muhtar Tileýberdi Japoniia Elshisi Tatsýhiko Kasaimen onyń diplomatiialyq missiiasynyń aiaqtalýyna orai kezdesý ótkizdi, dep habarlaidy "Ult aqparat".
M.Tileýberdi eki el arasyndaǵy saiasi dialogtyń, saýda-ekonomikalyq, investitsiialyq jáne gýmanitarlyq bailanystardyń údemeli damýyn qanaǵattanýshylyqpen atap ótti. Ministr japon tarapyna COVID-19 koronavirýsymen kúreste kórsetken kómegi úshin rizashylyǵyn bildirdi. Ol Qazaqstan men Japoniianyń ekonomikalyq yntymaqtastyq jónindegi jeke sektorlary jáne úkimetaralyq komissiiasynyń 8-shi otyrysyn jaqyn arada ótkizýdiń mańyzdylyǵyn atap ótti.
«Japoniia 7 mlrd AQSh dollarynan astam somaǵa salymdardyń jalpy kólemi bar Qazaqstannyń 10 iri sheteldik investorynyń qataryna kiredi», - delingen QR Syrtqy ister ministrligi málimetinde.
Aita keteiik, jaqynda Elshi Tatsýhiko Kasai óziniń diplomatiialyq missiiasy aiaqtalyp kele jatqanyn jáne Japoniiaǵa oralatynyn jariialady.
Óz málimdemesinde Elshi biyl Qazaqstan Táýelsizdiginiń 30 jyldyǵy ekendigin aita kele, 1991 jyldan bastap el halqy memleketti nyǵaitý jolynda eńbek etkenin atap ótti.
«Osy 30 jylda Japoniia halyqaralyq qoǵamdastyqpen birlese Qazaqstannyń gúldenýin qoldap keldi jáne qoldai beredi. Bul baǵytta Qazaqstan eleýli jetistikterge qol jetkizdi», - dep jazdy Tatsýhiko Kasai.
Sonymen qatar ol Qazaqstan men Japoniia qundylyqtar boiynsha ortaq kózqarasqa ie ekenin jáne ilgerileý jolynda birlese eleýli serpilis jasai alatyndyǵyn sóz etti.
«Men aldaǵy ýaqytta da eki el arasyndaǵy qatynastardyń, dostyqtyń ári yntymaqtastyqtyń damýyna ózimniń kúsh-jigerimdi salatyn bolamyn», - dedi ol.
Onyń aitýynsha, Japoniianyń jańa Elshisi Dziýn Iamada sáýir aiynyń sońynda Qazaqstanǵa keledi.
