Qazaqstannyń jetekshi infektsionist dárigeri, meditsina ǵylymdarynyń doktory Dinagúl Baesheva koronavirýs infektsiiasyna qarsy testileýdi ornyqty júrgizýdi usyndy, dep habarlaidy QazAqparat.
«Elimizde aýyrǵan adamdar sany, ásirese, simptomsyz naýqastar sany óse bastady. Oǵan TJ rejiminiń alynýy, karantindi jeńildetý sebep boldy. Ózimiz de epidemiiaǵa qarsy sharttardy qoldanbai kettik. Sondyqtan qazir virýs juqtyrǵandar sany ósip barady. Biraq, oǵan esh qorqynysh, dúrbeleń bolmaýy kerek. Sebebi, 100 adam aýyrsa, onyń 80 paiyzy jeńil nemese simptomsyz túrde ótedi. Al 15 paiyzy ortasha jáne aýyr, 5 paiyzy – asa aýyr túrde túsedi», - dedi maman Feisbýk jelisinde ótken onlain suhbatta.
Onyń aitýynsha, aýrý sany óse túskenniń ózinde de simptomy joq adamdar qoryqpaýy kerek. Shamamen 7 kúnde aýrý báseńdeidi, sodan keiin taǵy 7 kún úide jatyp, saýyǵyp shyǵý kerek.
«Naýqastardyń 70 paiyzy testileý arqasynda tabyldy. Munda PTR testileýdi de durys júrgizý kerek. Mysaly, úlken kompaniiada qarym-qatynasta bolǵan qyzmetkerlerine test júrgiziledi. Al jai adamdardyń betaldy testten ótýi durys emes. Ýaqyt pen aqshany jumsap, test tapsyrasyz. Odan keiin tasymaldaýshymen kezdesip, aýrý juqtyryp, PTR nátijem teris edi ǵoi dep, aýrýǵa mán bermeisiz. Sondyqtan japatarmaǵai PTR tapsyrmai turyp, dárigermen aqyldasý kerek», - dedi D. Baesheva.
Qazir jaz mezgilinde sýyq sý ishetinder kóp, aýa baptaǵyshtan da salqyn tiedi. Sodan sýyq tiiýi de múmkin.
«Árine, dene qyzýy, jótel baiqalyp, týystaryńyz KVI-men emhanada jatsa, koronavirýs týraly oilanýǵa bolady. Munda Jedel járdemge nemese tirkelgen emhanadaǵy dárigerge habarlasyp, aqyldasýyńyz kerek. Bizdi emdeńiz dep, 80 paiyz jeńil túrde ótetin naýqastar emhanaǵa jatyp alsaq, aýyr túrde ótetin naýqastar shette qalyp qoiady. Sondyqtan, dúrlikpeý kerek», - dedi Dinagúl Baesheva.
