Elimizde janýarlarǵa qatygezdik tanytqandardy ákimshilik jáne quqyqtyq jaýapkershilikke tartý josparlanyp otyr. Bul týraly QR Ekologiia, geologiia jáne tabiǵi resýrstar vitse-ministri Áliia Shalabekova málim etti, dep habarlaidy QazAqparat.
Onyń aitýynsha, «Janýarlarǵa jaýapkershilikpen qaraý týraly» zań jobasynda janýardyń ómiri, densaýlyǵy jáne jaǵdaiy úshin iesiniń jeke jaýapkershiligi kózdelgen. Naqtyraq aitqanda, janýarlarǵa qylmystyq jazalanatyn is-áreket belgileri joq qatygezdikpen qaraǵandar ákimshilik jazaǵa tartylady. Al janýardyń ólimine ákep soqqan quqyq buzýshylyq úshin jaza 120-dan 200 ailyq eseptik kórsetkishke deiin aiyppul salynady. Mundai qaitalanǵan kezde aiyppul kólemi 1000 AEK-ke deiin jetedi nemese bir jylǵa deiin bas bostandyǵynan aiyrý jazasy qoldanylady.
«Usynylǵan zań jobasy janýarlarǵa qatysty jaǵymsyz kórinisterge tosqaýyl qoiady. Mundai kórinisterge itterdiń tóbelesin ótkizý, anesteziiasyz veterinariialyq operatsiialar júrgizý, janýarlardy zańsyz óltirý, janýarlardy álsiretý jáne olarǵa ýaqtyly kómek kórsetpeý, qatygezdikpen aýlaý, janýarlardyń eti men maiyn paidalaný, sondai-aq jeýge jáne ónim alýǵa arnalmaǵan áreketter jatady»,- dedi vitse-ministr Ortalyq kommýnikatsiialar qyzmetindegi baspasóz máslihatynda.
Áliia Shalabekovanyń sózine qaraǵanda, zań jobasynyń erejelerin iske asyrý úshin qoldanystaǵy zańnamaǵa, atap atqanda, Qylmystyq kodekske, Ákimshilik quqyq buzýshylyq týraly kodekske, «Jergilikti memlekettik basqarý jáne ózin-ózi basqarý týraly», «Veterinariia týraly», «Janýarlar» dúniesin qorǵaý, ósimin molaitý jáne paidalaný týraly» Zańdarǵa ózgerister men tolyqtyrýlar engizilmek.
